ខេត្តតាកែវ, ក្នុងឱកាសចុះសួរសុខទុក្ខ និងផ្តល់អំណោយនាថ្ងៃសៅរ៍ ទី ៦ ខែកុម្ភៈ ឆ្នាំ២០២១នេះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតស្រឡាញ់ ព្រមជាមួយនឹងការគិតគូរពីសុខភាព និងជីវភាពរស់នៅរបស់លោកតាលោកយាយ ក៏ដូចជាប្រជាពលរដ្ឋទាំងអស់។ ទន្ទឹមនឹងនេះ លោកស្រី បានលេីកទឹកចិត្តដល់ប្រជាពលរដ្ឋទាំងអស់សូមថែទាំសុខភាពឱ្យបានល្អ អនុវត្តឱ្យបានខ្ជាប់ខ្ជួនវិធានការរបស់ក្រសួងសុខាភិបាល ទប់ស្កាត់ការរីករាលដាលជំងឺកូវីដ-១៩។
លោកយាយលោកតាទាំងអស់ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចតេជោ ហ៊ុន សែន ដែលតែងតែគិតគូរពីសុខទុក្ខរបស់ប្រជាពលរដ្ឋ និងសូមជូនពរសម្តេចទាំងទ្វេរ មានសុខភាពល្អ ជន្មាយុយឺនយូរ ដេីម្បីផ្តល់ភាពកក់ក្តៅ និងដឹកនាំប្រទេសជាតិឱ្យមានសុខសន្តិភាព និងការអភិវឌ្ឍជានិច្ច។
សូមបញ្ជាក់ថា គ្រួសារនីមួយៗទទួលបាន អង្ករ មី ត្រីខ ទឹកត្រី ទឹកស៊ីអ៊ីវ មុង ភួយ សារុង ក្រមា អាវយឺត និងថវិកាមួយចំនួន៕
ដោយ, សិលា
