ភ្នំពេញ ៖ រនាំងដែកពុះចែកទ្រូងផ្លូវ៣ផ្ទាំង បានរងការខូចខាត ដោយសារថយន្តកូរ៉ូឡាមួយគ្រឿង បើកបរដោយនារីស្រ្ដីម្នាក់ បានជ្រុលចង្កូតបុក បង្កការភ្ញាក់ផ្អើលកាលពីវេលាម៉ោង៧ និង១០នាទី យប់ ថ្ងៃទី១៥ ខែកក្កដា ឆ្នាំ២០១៥ តាមបណ្ដោយមហាវិថីសហព័ន្ធរុស្សី ត្រង់ចំណុចក្បែរព្រលានយន្តហោះ អន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ស្រ្ដីដែលបើកបររថយន្តឈ្មោះហុង លក្ខិណា ភេទស្រី អាយុ២៥ឆ្នាំ មុខរបរលក់ដូរ មានទីលំនៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ ។
តាមសម្ដីរៀបរាប់របស់ស្រ្ដីអ្នកបើកបររយន្តខាងលើបានឲ្យដឹងថា មុនពេលកើតហេតុគាត់បើករថយន្តកូរ៉ូឡា ពណ៌ស្ករ ពាក់ស្លាកលេខ ភ្នំពេញ 2V 8021 ទិសដៅពីលិចទៅកើត។ លុះមកដល់ចំណុចខាងលើក៏ប្រទះ នឹងរថយន្តមួយគ្រឿងមិនចាំម៉ាកបើកខាងមុខ គាត់បានចាប់ហ្រ្វាំងបន្ថយល្បឿន ធ្វើឲ្យគាត់ងាកចង្កូតទៅខាងឆ្វេងបន្តិច ក៏បានជ្រុលទៅបុករនាំងដែកពុះចែកផ្លូវ បណ្ដាលឲ្យបាក់អស់៣ផ្ទាំងតែម្តង ។
ក្រោយពេលកើតហេតុស្រ្តីជាអ្នកបើកបរត្រូវបានសមត្ថកិច្ចឃាត់ខ្លួនរួមជាមួយរថយន្តបង្ក បញ្ជូនទៅការិយាល័យនគរបាលចរាចរណ៍ផ្លូវគោក ដើម្បីដោះស្រាយតាមផ្លូវច្បាប់៕ វិបុល
