ភ្នំពេញ៖ ជនសង្ស័យចំនួន៣នាក់ជិះម៉ូតូ២គ្រឿងធ្វេីសកម្មភាពឆក់យកកាបូបស្ពាយពីស្ត្រីម្នាក់បានសម្រេចហេីយព្យាយាមជិះម៉ូតូគេចខ្លួនតែជ្រុលទៅបុកគូទរថយន្តមួយគ្រឿងបណ្តាលឲ្យដួលរងរបួសត្រូវសមត្ថកិច្ចឃាត់បានភ្លាមៗម្នាក់ចំណែក២នាក់ទៀតជិះម៉ូតូគេចខ្លួនបាត់។
ហេតុការណ៍នេះបានកេីតឡេីងកាលពីវេលាម៉ោង៦និង២០នាទីព្រឹក ថ្ងៃទី៩ ខែមីនា ឆ្នាំ២០២១ នៅតាមបណ្តោយមហាវិថីសហព័ន្ធរុស្ស៊ី ភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ។
ជនសង្ស័យឈ្មោះឃឹម សុវណ្ណរាជ ភេទប្រុស អាយុ១៨ឆ្នាំ មុខរបរនៅផ្ទះ ស្នាក់នៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។
ចំណែកជនសង្ស័យដែលគេចខ្លួនចំនួន២នាក់នោះទី១-ឈ្មោះយ៉ែប ភេទប្រុស អាយុ២១ឆ្នាំ ទី២-ឈ្មោះម៉ាន ភេទប្រុស អាយុ២៣ឆ្នាំ។
រីឯជនរងគ្រោះឈ្មោះវង់ វ៉ែ ចាន់ ភេទស្រីអាយុ៣៨ឆ្នាំ មុខរបរកម្មការិនីរោងចក្រ ស្នាក់នៅសង្កាត់គោកឃ្លាង ខណ្ឌសែនសុខ។
តាមសម្តីជនរងគ្រោះបានឲ្យដឹងថា មុនពេលកេីតហេតុរូបគាត់បានឈរចាំជិះឡានតាក់ស៊ី លុះមកដល់វេលាម៉ោង៦ជាងស្រាប់តែមានជនសង្ស័យ២នាក់ជិះម៉ូតូមួយគ្រឿងម៉ាកឃ្លីក ពណ៌ខ្មៅ ពាក់ស្លាកលេខភ្នំពេញ1II -1402 មកធ្វេីសកម្មភាពឆក់យកកាបូបស្ពាយរបស់គាត់បានសម្រេចហេីយពួកគេព្យាយាមជិះម៉ូតូគេចខ្លួនតែជ្រុលទៅបុកគូទរថយន្តពេញទំហឹងបណ្តាលឲ្យដួលបាក់ជេីងម្នាក់ ចំណែកម្នាក់ទៀតបានរត់ឡេីងជិះម៉ូតូបក្សពួកម្នាក់ទៀតគេចខ្លួនបាត់ស្រមោល។
ក្រោយកេីតសមត្ថកិច្ចបានឃាត់ខ្លួនជនសង្ស័យយកទៅសួរនាំ ចំណែកកាបូបរបស់ជនរងគ្រោះត្រូវបានសមត្ថកិច្ចប្រគល់ជូនជនរងគ្រោះវិញ៕
ដោយ៖សុខាសែនជ័យ
