ខេត្តបាត់ដំបង៖ ដោយអនុវត្តន៍តាមបទបញ្ជារបស់លោកឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងក្នុងការបង្ក្រាបទប់ស្កាត់រាល់បទល្មើសនានាដែលកើតមាននៅក្នុងមូលដ្ឋានរបស់ខ្លួន ដើម្បីរួមចំណែករក្សាឱ្យបាននូវសុខសុវត្ថិភាពជូនប្រជាពលរដ្ឋ។
ជាក់ស្ដែងនៅវេលាម៉ោង១០និង៣០នាទី ថ្ងៃទី ១២ខែមីនា ឆ្នាំ២០២១ លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្ត បានដឹកនាំកម្លាំងការិយាល័យជំនាញរួមជាមួយក្រុមអន្តរាគមន៍បង្ការបង្ក្រាបចុះសហការជាមួយកម្លាំងនៃអធិការដ្ឋាននគរបាលស្រុកឯកភ្នំ បើកការស្រាវជ្រាវស្វែករកក្រុមជនសង្ស័យទាំងពីរក្រុមដែលជាប់ពាក់ព័ន្ធក្នុងករណីប្រយុទ្ធគ្នាធ្វើឱ្យខូចខាតដោយចេតនាមានស្ថានទម្ងន់ទោស ( កាប់និងគប់លេីម៉ូតូ )។
លោកវរសេនីយ៍ឯក ឈឿង គឹមសុង ប្រធានការិយាល័យនគរបាលព្រហ្មទណ្ឌកម្រិតស្រាល បានបញ្ជាក់ឱ្យដឹងថា នៅក្នុងកិច្ចប្រតិបត្តិការបើកការស្រាវជ្រាវយ៉ាងយកចិត្តទុកដាក់នៅក្នុងមូលដ្ឋានស្រុកឯកភ្នំនេះដែរ សមត្ថកិច្ចជំនាញបានធ្វើការនាំខ្លួនជនសង្ស័យចំនួន២ក្រុមមានគ្នាចំនួន១៥នាក់ ដែលក្នុងនោះមានក្រុម Boy Srer ចំនួន៨នាក់ និងក្រុម Boy Loy ចំនួន៧នាក់ រួមជាមួយវត្ថុតាងរួមមាន ៖
- ម៉ូតូម៉ាកហុងដាប៊ីត ពណ៌ខៀវ ស ពាក់ស្លាកលេខ បាត់ដំបង 1AK-7980 ចំនួន ១គ្រឿង
- ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ ២០១២ ពាក់ស្លាកលេខបាត់ដំបង1N- 8871 ចំនួន១គ្រឿង
- កាំបិតខ្វែវដងឫស្សីប្រវែង១ម៉ែត្រចំនួន១ដើម
- ដុំឥដ្ឋចំនួន២ដុំ ។
លោកប្រធានការិយាល័យដដែលបានបញ្ជាក់ថា កាលពីថ្ងៃទី១១ ខែមីនា ឆ្នាំ២០២១ វេលាម៉ោង១៦និង២០នាទីនៅចំណុចមុខផ្ទះលក់គ្រឿងសំណង់យីហោ រុន ម៉េង ក្នុងភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង មានក្រុមយុវជនចំនួនពីរក្រុមបានបើកការប្រយុទ្ធគ្នាយ៉ាងសាហាវនៅលើផ្លូវសាធារណ: និងបានបង្កការភ្ញាក់ផ្អើលយ៉ាងខ្លាំងទៅដល់បងប្អូនប្រជាពលរដ្ឋ តែករណីនេះមិនបណ្តាលឱ្យមានគ្រោះថ្នាក់ដល់មនុស្សឡេីយ ដោយខូចខាតតែម៉ូតូចំនួន២គ្រឿងប៉ុណ្ណោះ។
ក្រោយពីកើតហេតុសមត្ថកិច្ចបានចុះបើកការស្រាវជ្រាវរហូតឈានដល់ការឃាត់ខ្លួនបានចំនួន១៥នាក់ ដែលជនសង្ស័យទាំងពីរក្រុមខាងលើនេះមានទំនាស់ជាមួយគ្នាផ្តើមមកពីការសរសេរខមមិន Comment ដៀមដាមឌឺដងដាក់គ្នាតាមរយៈបណ្ដាញសង្គម Tik tok នាពេលកន្លងមក ហើយក៏ផ្តើមទៅជាសកម្មភាពជាក់ស្តែងនៅលើសមរភូមិដងផ្លូវក្នុងមូលដ្ឋានខាងលើតែម្តង។
ក្រុមជនសង្ស័យទាំង១៥នាក់ ក្រោយពីឃាត់ខ្លួនរហូតដល់ពេលនេះត្រូវសមត្ថកិច្ចការិយាល័យជំនាញកំពុងកសាងសំណុំរឿង ដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី៕
ដោយ៖ ចន្ទ លីហ្សា
