កម្មវិធី French Open ត្រូវបានពន្យារពេល១សប្តាហ៍ដោយសង្ឃឹមថាអ្នកទស្សនាកាន់តែច្រើននឹងត្រូវបានអនុញ្ញាតឱ្យចូលរួម។ នេះបើយោងតាមការចេញផ្សាយរបស់ BBC Sport កាលពីរសៀលថ្ងៃទី៨ ខែមេសា ឆ្នាំ២០២១។

ការប្រកួត Grand Slam នៅ Roland Garros ឥឡូវនេះនឹងចាប់ផ្តើមពីថ្ងៃទី ៣០ ខែឧសភាដល់ថ្ងៃទី ១៣ ខែមិថុនាជាមួយនឹងការជម្រុះមួយសប្តាហ៍មុន។

ប្រទេសបារាំងស្ថិតនៅក្នុងការបិទទូទាំងប្រទេសលើកទី៣ក្នុងចំណោមការកើនឡើងនៃករណីឆ្លងវីរុសកូវីដ–១៩ ដែលប្រធានាធិបតីលោក អេម៉ានុយអែល ម៉ាក្រុង ធ្លាប់បាននិយាយថា គាត់រំពឹងថានឹងបញ្ចប់នៅពាក់កណ្តាលខែឧសភាខាងមុខ។

សហព័ន្ធកីឡាវាយតឺន្នីសបារាំង (FFT) បានប្រកាសថា ការពន្យារពេលគឺជាដំណោះស្រាយដ៏ល្អបំផុត។

លោក Gilles Moretton ប្រធានក្រុមហ៊ុន FFT បាននិយាយថា “ខ្ញុំមានសេចក្តីសោមនស្សរីករាយដែលកិច្ចពិភាក្សាជាមួយអាជ្ញាធរសាធារណៈអង្គភាពគ្រប់គ្រងកីឡាវាយតឺន្នីសអន្តរជាតិ ដៃគូ និងអ្នកចាក់ផ្សាយរបស់យើង និងការងារដែលកំពុងបន្តជាមួយ WTA និង ATP បានធ្វើឱ្យយើងអាចពន្យារពេលការប្រកួត Roland Garros ២០២១ មួយសប្តាហ៍ ។

លោកបន្តថា “វានឹងផ្តល់ឱ្យស្ថានភាពសុខភាពនូវពេលវេលាបន្ថែមទៀតដើម្បីកែលំអរ ហើយគួរតែបង្កើនប្រសិទ្ធភាពឱកាសរបស់យើងក្នុងការស្វាគមន៍អ្នកទស្សនានៅ Roland Garros ចូលទៅក្នុងពហុកីឡដ្ឋានដែលបានផ្លាស់ប្តូរថ្មីរបស់យើងដែលឥឡូវនេះមានទំហំជាង៣០ហិកតា។សម្រាប់អ្នកគាំទ្រកីឡាករ និងបរិយាកាសវត្តមាននៃអ្នកទស្សនាគឺមានសារសំខាន់ណាស់សម្រាប់ការប្រកួតរបស់យើងព្រឹត្តិការណ៍កីឡាអន្តរជាតិដ៏សំខាន់បំផុតនៅនិទាឃរដូវនេះ”។

នៅឆ្នាំ២០២០ ព្រឹត្តិការណ៍ French Open ត្រូវបានពន្យារពេលដល់រដូវស្លឹកឈើជ្រុះដោយសារជំងឺរាតត្បាតកូវីដ–១៩ ។

កីឡាករ Rafael Nadal បានឈ្នះពានរង្វាន់ឯកត្តជនបុរសលើកទី១៣របស់គាត់នៅឯ Roland Garros ខណៈដែលយុវជន Iga Swiatekរបស់ប៉ូឡូញបានឈ្នះពានរង្វាន់ Grand Slam ជាលើកដំបូងរបស់ខ្លួននៅចំពោះមុខអ្នកគាំទ្រដែលមានចំនួន១,០០០នាក់ដែលនេះជាចំនួនអនុញ្ញាតអតិបរមានៅពេលនោះ។ ការប្រកួតឆ្នាំ២០២១ ឥឡូវនឹងត្រូវបញ្ចប់តែ២សប្តាហ៍មុនការចាប់ផ្តើម Wimbledon ។

ការពន្យារពេលត្រូវបានកំណត់ថា នឹងមានឥទ្ធិពលលើប្រតិទិន ATP និង WTA ជាមួយនឹងរដូវកាលស្មៅដែលគ្រោងនឹងចាប់ផ្តើមនៅថ្ងៃទី៧ ខែមិថុនាដោយមានការប្រកួតនានានៅ Hertogenbosch, Stuttgart និង Nottingham ។

អង្គភាពគ្រប់គ្រង ATP និង WTA បាននិយាយនៅក្នុងសេចក្តីថ្លែងការណ៍រួមមួយថា ពួកគេកំពុងធ្វើការពិគ្រោះយោបល់ជាមួយភាគីទាំងអស់ដែលរងផលប៉ះពាល់ដោយការពន្យារពេលនេះ។

អង្គភាពគ្រប់គ្រងកីឡាវាយតឺន្នីសចក្រភពអង់គ្លេសឈ្មោះ LTA បាននិយាយថា “ការសម្រេចចិត្តផ្លាស់ប្តូរ Roland Garros នឹងបង្កើតផលប៉ះពាល់យ៉ាងខ្លាំងសម្រាប់រដូវស្មៅនៅរដូវក្តៅ។ បច្ចុប្បន្នយើងកំពុងពិនិត្យមើលផលប៉ះពាល់សម្រាប់ព្រឹត្តិការណ៍របស់យើង ហើយប្រសិនបើយើងត្រូវការធ្វើការផ្លាស់ប្តូរ ទៅប្រតិទិនរបស់យើង ៕ដោយ ៖ ភារៈ