ខេត្តកណ្តាល៖ យុវជនម្នាក់ទៅពីភ្នំពេញលេងជីដូនជីតានៅឯស្រុកស្អាង ពេលទៅដល់ឃើញបងប្អូនជីដូនមួយងូតទឹកទន្លេលេងយ៉ាងសប្បាយក៏ចុះទៅងូតលេងជាមួយ ខណៈកំពុងលេងភ្លេចខ្លួនរបូតដៃចេញពីផែទូកដរ បណ្តាលឲ្យលង់ស្លាប់យ៉ាងអណោចអធ័មគ្រាដែលបងប្អូនជីដូនមួយជួយមិនទាន់ ។
ករណីលង់ទឹកស្លាប់នេះបានកើតឡើង កាលពីវេលាម៉ោង១៧ និង៣០នាទី ថ្ងៃទី០៦ ខែមីនា ឆ្នាំ២០១៦ នៅត្រង់ចំណុចកំពង់ដរព្រែកមៅ់(ទូកដរចុងកោះ-តាលន់) ស្ថិតក្នុងភូមិស្វាយជួរ ឃុំកោះខែល ស្រុកស្អាង ។
មន្ត្រីនគរបាលស្រុកស្អាងបានឲ្យដឹងថា ជនរងគ្រោះឈ្មោះ សម្បត្តិ លាងហេង ភេទប្រុស អាយុ១៧ឆ្នាំ ជនជាតិខ្មែរ មុខរបរ សិស្ស មានឪពុកឈ្មោះ ចក់ សម្បត្តិ អាយុ៥០ឆ្នាំ ម្តាយឈ្មោះ អ៊ុច សុភាព អាយុ៤៥ឆ្នាំ មានទីលំនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ប្រភពដដែលបានបន្តថា នៅមុនពេលកើតហេតុជនរងគ្រោះនឹងឪពុកម្តាយបាននាំគ្នាទៅលេងជីដូនជីតានៅឯឃុំកោះខែល ស្រុកស្អាង ។ ពេលទៅដល់ជនរងគ្រោះបានឃើញបងប្អូនជីដូនមួយងូតទឹកទន្លេបាសាក់លេងយ៉ាងសប្បាយ ក៏ចុះទៅងូតទឹកលេងនឹងគេដោយហែលតោងនិងបង្គោលផែទូកដរ ។ គ្រានោះជនរងគ្រោះបានរបូតដៃចេញពីបង្គោផែ បណ្តាលឲ្យលង់លិចចូលទៅក្នុងទឹកបាត់ខ្លួនមួយសន្ទុះ ទើបបងប្អូនមុជរាវរកប្រទះឃើញ ខណៈដែលជនរងគ្រោះបានដាច់ខ្យល់ស្លាប់បាត់ទៅហើយ ។ បច្ចុប្បន្នក្រុមគ្រួសារបាននាំយកសាកសពជនរងគ្រោះទៅធ្វើបុណ្យតាមប្រពៃណី ដោយពុំមានការប្តឹងប្តល់អ្វីឡើយ ៕
ដោយ៖ ស្អាងជ័យ
