ភ្នំពេញ៖ នារីម្នាក់ជិះម៉ូតូទៅស៊ីការមិត្តភក្តិមិនទាន់ទៅដល់រោងការផងត្រូវជនសង្ស័យម្នាក់ជិះម៉ូតូមកឆក់ទូរស័ព្ទម៉ាកiPhone 6 plus បានសម្រេចបំរុងជិះគេចខ្លួនត្រូវសន្តិសុខកោះពេជ្រឃាត់ខ្លួនបានភ្លាមៗរួចប្រគល់ឲ្យសមត្ថកិច្ចប៉ុស្តិ៍ទន្លេបាសាក់កាលពីវេលាម៉ោង៧នាទីយប់ថ្ងៃទី៩ ខែមីនា នៅក្នុងបរិវេណកោះពេជ្រមុខអាគារL ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ជនសង្ស័យមានឈ្មោះ សេង រ៉ា វុធ អាយុ២៥ឆ្នាំ ស្នាក់នៅសង្កាត់ទួលស្វាយព្រៃ ២ ខណ្ឌចំការមន មានស្រុកកំណើតនៅ ភូមិតាខ្មៅ ក្រុងតាខ្មៅ ខេត្តកណ្តាល ។ ចំណែកឯជនរងគ្រោះមាន ឈ្មោះ តាំង ឈីវគឹម ភេទស្រី អាយុ២៤ឆ្នាំ ស្នាក់នៅផ្ទះលេខ៤ សង្កាត់បឹងត្របែក ខណ្ឌចំការមន ។
តាមប្រភពព័ត៌មានពីនារីរងគ្រោះបានឲ្យដឹងថា មុនពេលកើតហេតុរូបខ្លួនបានមកញ៉ាំការមិត្តភក្កិនៅកោះពេជ្រ ខណៈពេលមកដល់មុខរោងការហើយបានយកទូរស័ព្ទម៉ាក iPhone 6 plus មកទូរស័ព្ទរកមិត្តភក្កិឲ្យចេញមកទទួល ខណៈពេលដែលកំពុងតែនិយាយទូរស័ព្ទស្រាប់តែលេចមុខជនសង្ស័យម្នាក់ជិះម៉ូតូម៉ាកហុងដាឌ្រីមស៊េរី២០១៦ ពណ៌ខ្មៅ អត់មានស្លាកលេខ បានធ្វើសកម្មភាពឆក់ទូរស័ព្ទពីនារីរងគ្រោះបានសម្រេចហើយបំរុងជិះម៉ូតូគេចខ្លួន ភ្លាមៗនោះសន្តិសុខរបស់កោះពេជ្រនិងកម្លាំងល្បាតរបស់ខណ្ឌចំការមនបានដេញចាប់បានត្រូវប្រជាពលរដ្ឋស្វាគមន៍មួយដៃមួយជើងម្នាក់បែកឈាមពេញ
មុខ ។
ក្នុងហេតុការណ៍ឆក់នោះជនរងគ្រោះបាត់ទូរស័ព្ទម៉ាក iPhone 6 plus មួយគ្រឿង និង លុយចំនួន៥០ដុល្លារទុកសម្រាប់ចងដៃការ រីឯទូរស័ព្ទនិងលុយរកមិនទាន់ឃើញនៅឡើយទេពេលដែលចាប់បានជនសង្ស័យបានហើយសមត្ថកិច្ចកំពុងតែសាកសួរស្រាវជ្រាវរកឲ្យជនរងគ្រោះបន្តទៀត ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលទន្លេបាសាក់ចំណែកជនសង្ស័យត្រូវបានសមត្ថកិច្ចកសាងសំណុំរឿងចាត់ការតាមច្បាប់ ៕ ដោយ៖ ស រស្មី
