ក្រុម Roma បានប្រកាសថា លោក Jose Mourinho នឹងក្លាយជាគ្រូបង្វឹករបស់ក្លិបនេះចាប់ពីរដូវកាលក្រោយទៅ។ នេះបើយោងតាមការចេញផ្សាយរបស់សារព័ត៌មាន MARCA នៅព្រឹកថ្ងៃទី៥ ឧសភានេះ។

គ្រូបង្វឹកសញ្ជាតិព័រទុយហ្គាល់រូបនេះត្រូវបានក្លិបមាន់ខ្នាយមាសTottenham Hotspur បណ្តេញចេញពីតំណែងកាលពីថ្ងៃទី១៩ ខែមេសាត្រូវបានក្លិបអុីតាលី Roma ប្រកាសជាផ្លូវការហើយ។

ក្នុងសេចក្តីប្រកាសមួយតាមរយៈសារធ្វីទ័រថា “ក្លិបមានសេចក្តីសោមនស្សរីករាយដែលបានប្រកាសពីកិច្ចព្រមព្រៀងមួយដែលបានឈានដល់ជាមួយលោក Jose Mourinho សម្រាប់គាត់ដើម្បីក្លាយជាគ្រូបង្វឹកថ្មីរបស់យើងនៅរដូវកាល ២០២១-២០២២” ។

លោក Jose Mourinho នឹងជំនួសលោក Paulo Fonseca ដែលជាមិត្តរួមជាតិ កំពុងដឹកនាំ Roma បច្ចុប្បន្ន ដែលនឹងចាកចេញពីតួនាទីជាគ្រូបង្វឹកនៅចុងបញ្ចប់នៃរដូវកាលនេះ។ លោក Mourinho ក៏បានផ្ញើសារទៅអ្នកគាំទ្ររបស់ក្រុម Roma នៅលើ Instagram ផងដែរ។

លោក Mourinho បានសរសេរថា “ខ្ញុំសូមថ្លែងអំណរគុណដល់ក្រុមគ្រួសារ Friedkin ដែលបានជ្រើសរើសខ្ញុំឱ្យដឹកនាំក្លិបដ៏អស្ចារ្យនេះ និងសម្រាប់ធ្វើឱ្យខ្ញុំក្លាយជាផ្នែកមួយនៃចក្ខុវិស័យរបស់ពួកគេ ។ បន្ទាប់ពីបានជួបជាមួយម្ចាស់ និងនាយកកីឡាលោក Tiago Pinto ខ្ញុំបានយល់ភ្លាមថាតើមហិច្ឆតារបស់ក្លិបនេះខ្ពស់ប៉ុនណា? សេចក្តីប្រាថ្នានិងការដឹកនាំនេះគឺដូចគ្នាដែលតែងតែជម្រុញខ្ញុំ និងរួមគ្នា!យើងចង់កសាងមាគ៌ាឈ្នះនៅក្នុងឆ្នាំក្រោយ”។

លោកបន្តថា “ចំណង់ចំណូលចិត្តមិនគួរឱ្យជឿរបស់អ្នកគាំទ្រ Roma បានបញ្ចុះបញ្ចូលខ្ញុំឱ្យទទួលយកការងារ ហើយខ្ញុំមិនអាចរង់ចាំចាប់ផ្តើមរដូវកាលក្រោយបានទេ។ ទន្ទឹមនឹងនេះដែរខ្ញុំសូមជូនពរឱ្យលោក Paulo Fonseca ជួបសំណាងល្អ ហើយស្នើសុំឱ្យប្រព័ន្ធផ្សព្វផ្សាយជ្រាបថា ខ្ញុំនឹងធ្វើសេចក្តីថ្លែងការណ៍កាន់តែច្បាស់ថែមទៀតនៅពេលខាងមុខ” ៕

 

ដោយ៖ ភារៈ