លោក Carlo Ancelotti បានចាកចេញពីក្លិប Everton ក្លាយជាគ្រូបង្វឹកក្រុម Real Madrid ជាលើកទី២ ក្នុងអាជីពរបស់លោក។ នេះបើយោងតាមការចេញផ្សាយរបស់សារព័ត៌មាន BBC Sport និងបណ្តាញធ្វីទ័ររបស់លោកផ្ទាល់នៅព្រឹកថ្ងៃទី២ មិថុនានេះ។

បុរសជនជាតិអ៊ីតាលីវ័យ៦១ឆ្នាំរូបនេះធ្លាប់គ្រប់គ្រង Real Madrid រយៈពេល២ឆ្នាំចន្លោះឆ្នាំ២០១៣ និងឆ្នាំ២០១៥ បានចាកចេញពីក្លិប Everton បន្ទាប់ពីទទួលបន្ទុក១៨ខែនៅឯកីឡដ្ឋាន Goodison Park ។ គាត់បានជោគជ័យជំនួសលោក Zinedine Zidane នៅ Real Madrid ហើយការចាកចេញនេះបានធ្វើឱ្យ Everton ស្វែងរកអ្នកគ្រប់គ្រងអចិន្រ្តៃយ៍ទី៦ក្នុងរយៈពេល៥ឆ្នាំ។

លោក Ancelotti បានចុះហត្ថលេខាលើកិច្ចសន្យារយៈពេល៣ឆ្នាំនៅឯ Real Madrid ហើយបាននិយាយថា ការផ្លាស់ប្តូរនេះតំណាងឱ្យ“ ឱកាសដែលមិននឹកស្មានដល់” ។

លោកបានបន្ថែមថា “ខ្ញុំមានការគោរពទាំងស្រុងចំពោះអ្នករាល់គ្នាដែលមានទំនាក់ទំនងជាមួយ Everton ហើយសង្ឃឹមថាពួកគេអាចទទួលបាននូវឱកាសដ៏រំភើបដែលពួកគេមាននៅចំពោះមុខពួកគេ។ ខណៈដែលខ្ញុំរីករាយនឹងនៅ Everton ខ្ញុំត្រូវបានគេផ្តល់ជូននូវឱកាសដែលមិននឹកស្មានដល់ដែលខ្ញុំជឿថាជាការផ្លាស់ប្តូរដ៏ត្រឹមត្រូវសម្រាប់ខ្ញុំ និងក្រុមគ្រួសាររបស់ខ្ញុំនៅពេលនេះ”។

Real Madrid នឹងបង្ហាញលោក Ancelotti ទៅកាន់ប្រព័ន្ធផ្សព្វផ្សាយនៅថ្ងៃពុធនេះ ខណៈដែល Everton បាននិយាយថាពួកគេនឹងចាប់ផ្តើមដំណើរការតែងតាំងអ្នកចាត់ការថ្មីភ្លាមៗ។

ទោះយ៉ាងណាលោក Ancelotti នៅតែត្រូវបានគាំទ្រយ៉ាងខ្លាំងពីសំណាក់អ្នកគាំទ្ររបស់ក្រុម Everton ដែលបានធ្វើឱ្យមានការខកចិត្តយ៉ាងខ្លាំងចំពោះការសម្រេចចិត្តចាកចេញ ៕ដោយ៖ភារៈ