ខេត្តស្វាយរៀង៖ នារសៀលថ្ងៃទី១០ ខែមិថុនា ឆ្នាំ២០២១ លោកបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានឱ្យដឹងថា លោកមានការព្រួយបារម្ភដោយក្នុងខេត្តស្វាយរៀង ស្ថានភាពជំងឺកូវីដ-១៩ នៅតែមានការចម្លងចូលក្នុងសហគមន៍បន្ទាប់ពី កម្មករ កម្មការិនីរោងចក្រធ្វើតេស្តមានវិជ្ជមាន មេរោគកូវីដ-១៩ ។
លោកបានបន្ថែមថា ជំងឺកូវីដ-១៩ នៅសហគមន៍ និងរោងចក្រសហគ្រាស មិនទាន់បានថមថយនៅឡើយទេដោយសារ មានកត្តា៤យ៉ាងគឺ:
ទី១ ក្រុមកម្មករមិនព្រមយកសំណាកនៅតាមរោងចក្រ និងមិនព្រមធ្វេីចត្តាឡីស័កនៅក្នុងរោងចក្រ
គាត់ទៅផ្ទះ ចម្លងជំងឺកូវីដ-១៩ ចូលក្នុងសហគមន៍ ។
ទី ២គម្លាតក្នុងពេលធ្វើដំណើររបស់បងប្អូនកម្មកទៅបម្រើការងាររោងចក្រសហគ្រាស មានការប្រមូលផ្ដុំជិះរថយន្តរួមគ្នាច្រើន ។
ទី៣ ពលករដែលធ្វើចំណាកស្រុកត្រឡប់មកពីប្រទេសថៃភាគច្រើនមានជំងឺកូវីដ-១៩ មកជាមួយ ។
និងទី៤ ការមិនគោរពតាមវិធានការណែនាំរបស់ក្រសួងសុខាភិបាល និងវិធានការ ៣កុំ ៣ការពារ របស់សម្តេចតេជោ ហ៊ុន សែន ផងដែរ។
លោកបានបន្ថែមថា ឥទ្ឋិពលនៃការរីករាលដាលជំងឺកូវីដ-១៩ នៅខេត្តស្វាយរៀង ក្នុងពេលបច្ចុប្បន្ន បាននិងកំពុងតែចម្លងចូលក្នុងសហគមន៍ និងរោងចក្រមួយចំនួន ខណៈដែលអ្នកជំងឺមានជាង ៤០០នាក់កំពុងតែសំរាកព្យាបាល ។
លោកបានបញ្ជាក់ទៀតថា នៅក្នុងព្រឹតិ្តការណ៍សហគមន៍ ២០កុម្ភះ ខេត្តស្វាយរៀងមានប្រជាពលរដ្ឋខ្មែរ និងជនបរទេស គិតត្រឹមថ្ងៃទី៨ ខែមិថុនាឆ្នាំ២០២១ បានឆ្លងជំងឺកូវីដ-១៩ មានចំនួន ១១៧៤នាក់ ស្រីចំនួន ៦៧៦នាក់ ស្លាប់ចំនួន ៧នាក់ ដោយមានការព្យាបាលជាសះស្បើយចំនួន ៧៣៦នាក់ ស្រី ៤១០នាក់ និងកំពុងធ្វើការព្យាបាលចំនួន ៤៣០នាក់ ស្រី ២៦៤នាក់ ។
លោកបានបន្ថែមថាបើបងប្អូនដែលពាក់ព័ន្ធទាំងផ្ទាល់ និងប្រយោលជាមួយអ្នកមានជំងឺកូវីដ-១៩ សូមធ្វើចត្តាឡីស័កតាមដានសុខភាព អនុវត្តតាមវិធានការណែនាំរបស់ក្រសួងសុខាភិបាល និងវិធានការ ៣ការពារ ៣កុំ របស់សម្ដេចតេជោហ៊ុនសែន។
ប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វេីតេស្តរកមេរោគ កូវីដ-១៩ (COVID-19) ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទៅយកវត្ថុវិភាគសំណាកនៅប៉ុស្ដិ៍យកសំណាកដែលនៅជិតផ្ទះ ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ ខេត្ត📞044 712 522 ឬ 097 503 4567 ដើម្បីមានវិធានការណ៍បន្ត ។
សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕
ដោយ៖ យឹម សុថាន
