ខេត្តកំពង់ឆ្នាំង៖ ជនសង្ស័យម្នាក់ក្នុងចំណោមបក្ខពួក ៤នាក់ត្រូវសមត្ថកិច្ចនគរបាលខេត្តនិងស្រុកទឹកផុស ព័ទ្ធចាប់បានក្នុងពេលដែលជនសង្ស័យទាំងនេះធ្វើសកម្មភាពលក់ និងប្រើប្រាស់ កាលពីវេលាម៉ោង៩និង៣០នាទីយប់ថ្ងៃទី១៦ ខែមីនា ឆ្នាំ២០១៦ នៅចំណុចស្ទឹងជីប្រ៉ង ស្ថិតក្នុងភូមិបឹងស្ទេង ឃុំខ្លុងពពក ស្រុកទឹកផុស ខេត្តកំពង់ឆ្នាំង ។
សមត្ថកិច្ចនគរបាលបានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ អ៊ួង ចាន់ថុន ភេទប្រុស អាយុ៣៣ឆ្នាំ រស់នៅភូមិខ្លុងពពក ឃុំខ្លុងពពក ស្រុកទឹកផុស ខេត្តកំពង់ឆ្នាំង ។ ក្នុងពេលឃាត់ខ្លួនសមត្ថកិច្ចបានដកហូត ម៉ូតូ២គ្រឿងនិងឧបករណ៍ជក់ថ្នាំញៀនមួយចំនួន ។
សមត្ថកិច្ចបានឲ្យដឹងថា នៅមុនពេលចាប់ខ្លួនជនសង្ស័យ សមត្ថកិច្ចបានទទួលព័ត៌មានស្តីពីសកម្មភាពរបស់ជនសង្ស័យ មានគ្នាចំនួន៤នាក់ មកជួបជុំគ្នា ដើម្បីប្រើប្រាស់ និងចែកចាយថ្នាំញៀន នៅក្នុងមូលដ្ឋាននេះ។ ក្រោយពីទទួលបានព័តមាននេះសមត្ថកិច្ចបានតាមរកមុខសញ្ញាជនសង្ស័យ នៅពេលដែលកម្លាំងទៅដល់ក្រុមជនសង្ស័យទាំងនេះបានរត់ចែកជើងគ្នា ចោលម៉ូតូ២គ្រឿង និង សម្ភារៈជក់ថ្នាំញៀន។ ចំណែកឯថ្នាំញៀនជនសង្ស័យបានបោះចោល ពេលរត់យករួចខ្លួន តែក្នុងពេលនោះសមត្ថកិច្ចចាប់បានជនសង្ស័យម្នាក់ក្នុងចំណោមបក្ខពួកពួកនាក់នេះ ។
បច្ចុប្បន្នសមត្ថកិច្ចបានកសាងសំណុំរឿងបញ្ជូនជនសង្ស័យមកស្នងការដ្ឋាននគរបាលខេត្តកំពង់ឆ្នាំង ដើម្បីចាត់ការបន្តតាមនីតិវិធី ៕ ចន្ថា
