🇨🇳 ចិនរិតបន្តឹងសន្តិសុខ ត្រៀមរៀបចំខួប១០០ឆ្នាំថ្ងៃបង្កើតបក្សកុម្មុយនិស្ត

ចែករំលែក៖

នៅពេលនេះចិនបានបិទតំបន់ជាច្រើនក្នុងរដ្ឋធានីប៉េកាំង ដើម្បីត្រៀមលក្ខណៈដង្ហែរក្បួន ក្នុងឱកាសខួបគម្រប់ ១០០ឆ្នាំនៃការចាប់កំណើតបក្សកុម្មុយនិស្តចិន នឹងការរស់រានរយៈពេល១០០ឆ្នាំកន្លងមក។

សារព័ត៌មាន South China Morning Post នៅថ្ងៃទី៣០ខែមិថុនា បានផ្សាយថា ទីក្រុងប៉េកាំងបានបិទការធ្វើចរាចរណ៍នៅតំបន់មួយចំនួនដែលនឹងត្រូវរៀបចំពិធីខួប១០០ឆ្នាំថ្ងៃបង្កើតបក្ស នៅថ្ងៃទី ០១ខែកក្កដា ។
រថយន្ត អ្នកធ្វើដំណើរ នៅទីលាន ធៀនអានម៉ែនត្រូវបានបិទតាំងពីថ្ងៃទី ២៨ខែមិថុនា មកម៉្លេះដើម្បីរៀបចំឲ្យបានល្អបំផុត ។
តាមគម្រោងអគ្គលេខាធិការបក្ស និងជាប្រធានាធិបតីចិន លោកស៊ីជីនពីង នឹងឡើងថ្លែងសុន្ទរកថាដ៏សំខាន់នៅទីលាន ធៀនអានម៉ែន នៅវេលាម៉ោង ៨ព្រឹកថ្ងៃទី ១ខែកក្កដា(ពេលវេលាក្នុងតំបន់) ដោយអាចលើកឡើងពីសមិទ្ធផលក៏ដូចជាចក្ខុវិស័យនយោបាយរបស់បក្សកុម្មុយនិស្តចិន ។ ពិធីនឹងផ្សាយផ្ទាល់តាមកញ្ជក់ទូរទស្សន៍ ដោយសារតែពលរដ្ឋមិនអនុញ្ញាតឲ្យទៅចូលរួមច្រើននោះឡើយ៕