នៅក្នុងសិក្ខាសាលាដែលមានប្រធានបទថា ចក្ខុវិស័យផ្នែកទេសចរណ៍របស់មីយ៉ាន់ម៉ាសម្រាប់ឆ្នាំ២០១៦នោះលោក Thet Lwin Loh ប្រធានសហព័ន្ធសហគមន៍អ្នកធ្វើដំណើររបស់មីយ៉ាន់ម៉ាបានមានប្រសាសន៍ថា តម្លៃសណ្ឋាគារសំបុត្រយន្តហោះនិងដំណើរទស្សនកិច្ចគួរតែមានការប្រកួតប្រជែងបន្ថែមទៀត។
លោក Tin Tun Aung នាយកគ្រប់គ្រងក្រុមហ៊ុនទេសចរណ៍ Thingazar Travels and Tours បានមានប្រសាសន៍ថា អត្រាបន្ទប់ស្ថិតក្នុង៥០ទៅ៧០ភាគរយខ្ពស់ជាងបណ្តាប្រទេសអាស៊ានផ្សេងទៀតបើទោះបីជាគុណភាពនៃបន្ទប់មានកម្រិតទាបក៏ដោយ។
លោកបានមានប្រសាសន៍ថា យើងចាំបាច់ត្រូវបណ្តុះបណ្តាលបុគ្គលិកនៅក្នុងវិស័យនេះហើយត្រូវបង្កើនសមត្ថភាពរបស់ពួកគេដើម្បីឈានទៅដល់កម្រិតអន្តរជាតិ។នេះគឺជាបញ្ហាចម្បងដ៏ធំបំផុតសម្រាប់វិស័យឧស្សាហកម្មទេសចរណ៍ក្នុងឆ្នាំ២០១៦នេះ។
លោកបានមានប្រសាសន៍ទៀតថា ឱកាសនៃការប្រកួតប្រជែងគឺនៅមានកម្រិតខ្ពស់បើទោះបីជាមានភ្ញៀវបរទេសចូលមកប្រទេសនេះស្ថិតក្នុងកម្រិតទាប៤៥លាននាក់កាលពីឆ្នាំមុនក៏ដោយ។
ក្រុមប្រតិបត្តិករគួរតែត្រួសត្រាយដើម្បីបំពេញនូវបទដ្ឋានអន្តរជាតិប្រសិនបើពួកគេចង់ទាក់ទាញភ្ញៀវបន្ថែមទៀតនិងចង់ឱ្យពួកគេត្រឡប់មកម្តងទៀតនោះ។
លោកបន្ថែមទៀតថា ប្រទេសនេះចាំបាច់ត្រូវតែផ្តោតការយកចិត្តទុកដាក់ទៅលើការទាក់ទាញភ្ញៀវទេសចរទាំងនោះតាមរយៈការធ្វើឱ្យប្រសើរឡើងនៃឧស្សាហកម្មទាក់ទងតាមរយៈការប្រើប្រាស់នូវពាណិជ្ជកម្មតាមអេឡិចត្រូនិក e-commerce។
លោក Hugo Schleicher ប្រធានគ្រប់គ្រងក្រុមហ៊ុន Jovago Myanmar បានឱ្យដឹងថា ៨០ភាគរយនៃភ្ញៀវទេសចរមកកាន់ប្រទេសមីយ៉ាន់ម៉ាកាលពីឆ្នាំមុនគឺជាអ្នកចូលមកដំបូង។
ពួកគេបានត្អូញត្អែរអំពីតម្លៃបន្ទប់ ។ លោកបានបន្ថែមទៀតថា នេះដោយសារតែតម្រូវការខ្ពស់បើធៀបនឹងការផ្គត់ផ្គង់ទាប។ប៉ុន្តែទោះបីជាយ៉ាងណាក៏ដោយដោយសណ្ឋាគារមួយចំនួនកំពុងតែត្រូវបានសាងសង់នោះលោកសង្ឃឹមថា តម្លៃបន្ទប់ទាំងនោះនឹងមានការប្រកួតប្រជែងបន្ថែមទៀត។
លោកបានសម្ដែងនូវគំនិតសុទិដ្ឋិនិយមអំពីវិស័យនេះនាពេលអនាគតដោយសារតែការវិនិយោគបន្ថែមទៀតនឹងត្រូវបានគេរំពឹងទុកហើយនេះនឹងទាក់ទាញភ្ញៀវទេសចរបន្ថែមទៀត។លោកមានភាពជឿជាក់ថា ប្រទេសមីយ៉ាន់ម៉ាអាចឈានទៅដល់កម្រិតដូចប្រទេសថៃនៅប៉ុន្មានឆ្នាំក្រោយៗនេះ ហើយអាចនឹងក្លាយជាប្រទេសឈានមុខគេផ្នែកទេសចរណ៍ក្នុងពិភពលោកដោយសារតែមានទេសភាពចាប់អារម្មណ៍ជាច្រើននិងជាពិសេសប្រជាជននៅទីនោះមានភាពរួសរាយរាក់ទាក់។
សូមបញ្ជាក់ថា ប្រទេសមីយ៉ាន់ម៉ាមានក្រុមហ៊ុនទេសចរណ៍ចំនួន ២,០០០ក្រុមហ៊ុនហើយមានសណ្ឋាគារចុះបញ្ជីចំនួន១,៤០០កន្លែងដែលមានបន្ទប់ប្រមាណជា ៥០,០០០បន្ទប់៕
