ខេត្តត្បូងឃ្មុំ ៖ កម្លាំងប៉ុស្តិ៍នគរបាលរដ្ឋបាលប៉ើស២ សហការជាមួយនិងកម្លាំងប្រជាការពារ បានឃាត់ខ្លួនជនសង្ស័យម្នាក់គ្រាដែល ឈររេរារួចព្យាយាមបោះចោលកញ្ចប់ ថ្នាំញៀនបម្រុងរត់គេចខ្លូន នៅចំណុចខ្ទមចាំស្រែខាងត្បូងភូមិប៉ើស ឃុំប៉ើស២ យប់ថ្ងៃទី០១ ខែកក្កដា ឆ្នាំ២០២១ ។
សមត្ថកិច្ចអោយដឹងថា នៅពេលកម្លាំងចុះល្បាតក្នុងភូមិសាស្ត្រខាងលេីបានប្រទះមុខសញ្ញាសង្ស័យម្នាក់ឈ្មោះ ខាន់ លីតា ភេទប្រុស អាយុ ២៤ឆ្នាំ រស់នៅភូមិទួលសម្បត្តិ ឃុំប៉ើស២ ស្រុកក្រូចឆ្មារ កំពុងឈររេរា នៅក្បែរខ្ទមខាងលើនោះ ។ ឃើញដូចនេះ កម្លាំងយើងបានជិះម៉ូតូចូលបម្រុងហៅឈ្មោះខាងលើមកធ្វើការសាកសួរ តែជននេះ ពេលឃើញសមត្ថកិច្ចយើង ក៏បោះថ្នាំញៀនចំនួន១កញ្ចប់ទៅទើរលើគុម្ពស្រូវខាងជើងខ្ទម ភ្លាមនោះកម្លាំងនគរបាលយើងក៏បានចុះទៅរើសយកថ្នាំញៀន និងឃាត់ខ្លួនជនសង្ស័យខាងលើនេះតែម្តង ។
ការឃាត់ជននេះដោយមានការឯកភាពពីលោកឧត្តមសេនីយ៍ត្រី ហុង ណាក់ ស្នងការរងទទួលផែនការងារប្រឆាំងបទល្មើសគ្រឿងញៀន និងមានការសម្របសម្រួលពីលោក សូ សុវិទ្យា ព្រះរាជអាជ្ញាររង នៃអយ្យការអមសាលាដំបូងខេត្តត្បូងឃ្មុំ ។
បច្ចុប្បន្ន ជនសង្ស័យ រួមនិងវត្ថុតាងខាងលើត្រូវបានបញ្ជូនមកអធិការដ្ឋាននគរបាលស្រុកក្រូចឆ្មារ ដើម្បីចងក្រងសំណុំរឿងតាមនីតិវិធី ៕
ដោយ៖ វណ្ណៈ
