កីឡាករ Philippe Coutinho ត្រូវបានគេផ្សារភ្ជាប់ជាមួយក្លិប AC Milan ហើយពេលនេះក្រុមខ្លាំងនៅ Serie A មួយនេះកំពុងពិចារណាក្នុងការផ្លាស់ប្តូរកីឡាករឆ្នើមរបស់ក្រុម Barcelona រូបនេះនៅរដូវក្តៅ។ នេះបើយោងតាមការចេញផ្សាយរបស់សារព័ត៌មានអេស្ប៉ាញ MARCA ។

កីឡាករវ័យ២៩ឆ្នាំរូបនេះទទួលបានការចាប់អារម្មណ៍ពីក្លិបអឺរ៉ុបជាច្រើនប៉ុន្តែលោក Rossoneri មានការចាប់អារម្មណ៍យ៉ាងខ្លាំង ដោយសារមានហិរញ្ញវត្ថុរឹងមាំដែលអាចឱ្យពួកគេបំពេញតាមការទាមទារប្រាក់ឈ្នួលខ្ពស់របស់ Coutinho បាន។

ស្របពេលដែលសារព័ត៌មានអុីតាលីបានរាយការណ៍ថា ក្រុម AC Milan កំពុងតែពិចារណាចុះកុងត្រាជាមួយ Coutinho កីឡាករ Junior Firpoគឺជាកីឡាករម្នាក់ទៀតដែលរំពឹងថា នឹងចាកចេញពីក្លិប Barcelona នៅរដូវក្តៅនេះដែរ។

Barcelona បានឈានដល់កិច្ចព្រមព្រៀងជាអាទិភាពក្នុងការលក់ខ្សែការពារឆ្វេង Junior Firpo ទៅ Leeds United ជាថ្នូរនឹងទឹកប្រាក់ជាង១៥លានអឺរ៉ូ ហើយការចាកចេញរបស់គាត់នឹងត្រូវប្រកាសជាផ្លូវការនៅពេលដែលគាត់បានធ្វើការពិនិត្យសុខភាពរួចរាល់នៅក្រុមថ្មីរបស់គាត់។

សូមបញ្ជាក់ថា កីឡាករ Philippe Coutinho សញ្ជាតិប្រេស៊ីលវ័យ២៩ឆ្នាំបានចាកចេញពីក្លិបហង្សក្រហម Liverpool ក្នុងឆ្នាំ២០១៨ ទៅចូលរួមជាមួយក្លិប Barcelona ប៉ុន្តែត្រូវបានក្លិប Bayern Munich ខ្ចីជើងមួយរដូវកាល ២០១៩–២០២០ ដោយរកបាន៨គ្រាប់ក្នុងការបង្ហាញខ្លួនឲ្យ Bayern Munich ២៣លើក។ កីឡាកររូបនេះក៏ជាសមាជិកក្រុមជ្រើសជាតិប្រេស៊ីលផងដែរ ដោយរកបាន១៨គ្រាប់ ក្នុងការបង្ហាញខ្លួនឲ្យជម្រើសជាតិ៦៣ប្រកួត ៕ដោយ៖ ភារៈ