ភ្នំពេញ៖ ជនសង្ស័យ២នាក់ត្រូវបានសមត្ថកិច្ចនគរបាលខណ្ឌដូនពេញឃាត់ខ្លួនភ្លាមៗបន្ទាប់ពីធ្វើសកម្មភាពឆក់កាបូបស្ត្រីម្នាក់មិនបានសម្រេច។

ហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី១៨ ខែមីនា ឆ្នាំ២០១៦ នៅមុខក្រុមហ៊ុន ខាំមីនធែល ផ្លូវ៨៨កែងព្រះស៊ីសុវត្ថិ ក្នុងសង្កាត់ស្រះចក ខណ្ឌដូនពេញ។

សមត្ថកិច្ចបានប្រាប់ឲ្យដឹងថា ជនសង្ស័យទាំង២នាក់ ទី១ឈ្មោះ ឌុច សុផល ភេទប្រុស អាយុ២៨ឆ្នាំ មុខរបរកម្មករសំណង់ មានទីលំនៅមិនពិតប្រាកដ(ជាអ្នកឆក់) និងទី២ឈ្មោះ គឹម សុផល ភេទប្រុស អាយុ៣៧ឆ្នាំ មុខរបររត់ម៉ូតូឌុប មានទីលំនៅមិនពិតប្រាកដ(ជាអ្នកបើកម៉ូតូ) ជិះម៉ូតូមួយគ្រឿងម៉ាក Wave-i ពណ៌ខ្មៅ ស៊េរីឆ្នាំ២០០៧ ពាក់ស្លាកលេខកណ្តាល 1H-1375។ ចំណែកជនរងគ្រោះមានឈ្មោះ ធី សារ៉េត អាយុ៣២ឆ្នាំ មុខរបរម៉ាស្សា មានទីលំនៅផ្ទះលេខ៦C ផ្លូវ៨០ ស្ថិតនៅភូមិ១៤ ក្នុងសង្កាត់ស្រះចក ខណ្ឌដូនពេញ។

បច្ចុប្បន្នជនសង្ស័យទាំង២នាក់រួមទាំងម៉ូតូត្រូវបានសមត្ថកិច្ចឃុំខ្លួនបណ្តោះអាសន្ននៅប៉ុស្តិ៍នគរបាលខណ្ឌដូនពេញ ដើម្បីកសាងសំណុំរឿងចាត់ការតាមនីតិវិធី៕

ដោយ៖ សដារ៉ា