ភ្នំពេញ៖ បុរសម្នាក់ស្រវឹងស្រាឡើងជោកជាំ ហើយជិះម៉ូតូក្នុងល្បឿនលឿន ក៏ទប់ចង្កូតលែងជាប់បណ្ដាលឲ្យដួលប្រកាច់ប្រកិន សន្លប់ស្ដូកស្ដឹង នៅនិងកន្លែង កាលពីវេលាម៉ោង១ និង១៥នាទីរំលងអធ្រាត្រឈានចូលថ្ងៃទី ១៩ ខែមិនា ឆ្នាំ២០១៦ ទុលមុខ និងវត្តស្ទឹងមានជ័យ ផ្លូវ២១៧ សង្កាត់ស្ទឹងមានជ័យ ខណ្ឌមានជ័យ ។
សាក្សីដែលឃើញហេតុការណ៍ខាងលើនេះបានឲ្យដឹងថា នៅមុនពេលកើតហេតុ គេបានឃើញបុរសម្នាក់អាយុប្រមាណ ២៥ឆ្នាំ បានជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ 1BH-7894 ធ្វើដំណើរ តាមផ្លូវ២១៧ ទិសដៅពីកើតទៅលិច ក្នុងល្បឿនលឿន ហើយថែមទាំងស្រវឹងស្រាជោកជាំផងដែរ លុះមកដល់ចំណុចកើតហេតុ ដោយសារតែអ្នកបើកបរស្រវឹងខ្លាំងពេក ក៏ទប់ចង្កូតលែងជាប់ បណ្ដាលឲ្យដួលប្រកាច់ប្រកិនអូសជិត១០០ម៉ែត្រ បោកខ្លួនជាប់នឹងរបាំងថ្មពុះចែកផ្លូវធ្វើឲ្យអ្នកបើកម៉ូតូរងរបួសដាច់មុខដាច់មាត់ និងបាក់កជើង ខាងឆ្វេង (របួសធ្ងន់) ត្រូវបានរថយន្តសង្គ្រោះដឹកយកទៅព្យាបាលនៅ គ្លីនិកឯកជន ចំណែកម៉ូតូ រងការខូចខាតយ៉ាងដំណំ ។
ក្រោយពេលកើតហេតុសមត្ថកិច្ចមូលដ្ឋានបានយកម៉ូតូរបស់ជនរងគ្រោះ ទៅរក្សាទុកប៉ុស្តិ៍នគរបាលស្ទឹងមានជ័យ ដើម្បីរងចាំប្រគល់ឲ្យម្ចាស់វិញ ៕
...
ដោយ៖ ជីម ភារ៉ា
