ភ្នំពេញ៖ ជនសង្ស័យជាមុខសញ្ញាឆក់កាបូបចំនួន៤នាក់បានជិះម៉ូម៉ូតូ២គ្រឿងចេញធ្វើសកម្មភាពឆក់យកកាបូបពីស្រ្តីម្នាក់បានសម្រេចហើយបម្រុងជិះម៉ូតូគេចខ្លួន ប៉ុន្តែត្រូវបានប្ដីរបស់ស្រ្តីរងគ្រោះឃើញនិងលោតហក់ទៅធាក់ទាន់ បណ្ដាលឲ្យជនសង្ស័យម្នាក់ធ្លាក់ពីលើម៉ូតូ ហើយឃាត់ខ្លួនបានភ្លាមៗប្រគល់ឲ្យនគរបាលនាំយកទៅសាកសួរ និងចាត់ការតាមច្បាប់។
ហេតុការណ៍នេះបានកើតឡើងកាលពីវេលាម៉ោង៦និង១០នាទីព្រឹកថ្ងៃទី២២ ខែកក្កដា ឆ្នាំ២០២១ នៅតាមផ្លូវជាតិលេខ៣ ត្រង់ចំណុចមុខរោងចក្រ«អូលីវ» ភូមិព្រៃកំបុត សង្កាត់ចោមចៅទី២ ខណ្ឌពោធិ៍សែនជ័យ។
ជនសង្ស័យដែលជនរងគ្រោះឃាត់ខ្លួនបាននេះឈ្មោះហ៊ន់ ម៉េងហ៊ួង ភេទប្រុសអាយុ១៥ឆ្នាំ ស្នាក់នៅបន្ទប់ជួល ភូមិឫស្សី សង្កាត់ស្ទឹងមានជ័យ៣ ខណ្ឌមានជ័យ។
ចំណែកបក្ខពួកដែលរត់គេចខ្លួននោះទី១-ឈ្មោះហាក់ អាយុ១៤ឆ្នាំ ទី២-ឈ្មោះសេន អាយុ១៥ឆ្នាំ ទី៣-ឈ្មោះឡុង អាយុ១៤ឆ្នាំ។
ដោយឡែកជនរងគ្រោះឈ្មោះមាស ម៉ារ៉ាឌី ភេទស្រី អាយុ២៩ឆ្នាំ មុខរបរលក់ដូរ មានទីលំនៅភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ ហើយនៅក្នុងកាបូបមានលុយ៩០ម៉ឺនរៀល ទូរស័ព្ទដៃ១គ្រឿង និងខ្សែដៃប្លាទីន១ខ្សែ។
តាមប្រភពព័ត៌មានបានឱ្យដឹងថា នៅមុនពេលកើតហេតុស្ត្រីរងគ្រោះបានឈរជជែកគ្នាលេងជាមួយអ្នកលក់មីឆា នៅត្រង់ចំណុចកើតហេតុ ខណៈនោះស្រាប់តែជនសង្ស័យទាំង៤នាក់ជិះម៉ូតូម៉ាកnex ពណ៌ស១គ្រឿងនិងពណ៌លឿង១គ្រឿងក្នុងទិសដៅពីត្បូងទៅជើង បានមកឆក់យកាបូបដែលស្រ្តីរូបនោះក្រវាត់ជាប់ចង្កេះ។ ពេលឆក់បានសម្រេចហើយក៏បានព្យាយាមជិះម៉ូតូគេចខ្លួន ប៉ុន្តែត្រូវប្ដីស្រ្តីរងគ្រោះឃើញបានលោតហក់ទៅធាក់បណ្ដាលឲ្យជនសង្ស័យឈ្មោះហ៊ន់ ម៉េងហ៊ួង ធ្លាក់ពីលើម៉ូតូ រួចក៏ឃាត់ខ្លួនបាន ចំណែកបក្សពួក៣នាក់ទៀតជិះម៉ូតូគេចខ្លួនបាត់ស្រមោល។
ក្រោយកេីតហេតុជនរងគ្រោះក៏បានរាយការណ៍ទៅសមត្ថកិច្ចឱ្យមកនាំខ្លួនជនសង្ស័យទៅសាកសួរនិងកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការបន្ត ចំណែកកាបូបត្រូវបានសមត្ថកិច្ចប្រគល់ជូនម្ចាស់វិញ៕
ដោយ៖ សុខាសែនជ័យ
