ភ្នំពេញ ៖ ស្ត្រីម្នាក់បានជិះម៉ូតូយ៉ាងលឿនទាំងមេឃកំពុងភ្លៀង ស្រាប់ តែពេលនោះត្រូវជនសង្ស័យជិះម៉ូតូដេញតាមពីក្រោយ រួចក៏ធ្វើសកម្មភាពឆក់យកកាបូបស្ពាយចំហៀងបានសម្រេច បណ្តាលឲ្យស្ត្រីជាម្ចាស់កាបូបធ្លាក់ពីលើម៉ូតូ បោកក្បាលនឹងថ្នល់ស្លាប់ភ្លាមៗនៅនឹងកន្លែងយ៉ាងអាណោចអាធ័មបំផុត។
ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង៨និ៣០នាទីយប់ ថ្ងៃទី៦ ខែកញ្ញា ឆ្នាំ២០២១ នៅតាមបណ្ដោយផ្លូវលេខ១៩៧៨ ទល់មុខផ្ទះលេខ L៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
សពស្ត្រីរងគ្រោះសមត្ថកិច្ចនៅមិនទាន់រកឃើញអត្តសញ្ញាណនៅឡើយទេ ហើយក៏មិនទាន់អាចទាក់ទងរកសាច់ញាតិឃើញនៅឡើយដែរនៅយប់ថ្ងៃកើតហេតុនោះ។ ចំណែកឯភិនភាគ
សពស្ត្រីរងគ្រោះគឺស្លៀកពាក់ខោអាវឈុតសម្រាប់ដេក ពណ៌ក្រហមកាឡាការ៉ូលាយលឿង មានអាយុប្រមាណ៣០ឆ្នាំ ជិះម៉ូតូម៉ាក Zoomer-X ពណ៌ឈាមជ្រូក ពាក់ស្លាកលេខ ភ្នំពេញ1FH-3509 ។
ប្រភពប្រភពពីប្រជាពលរដ្ឋនៅកន្លែងកើតហេតុបានឱ្យដឹងថា មុនពេលកើតហេតុ ពួកគាត់បានឃើញស្ត្រីខាងលើជិះម៉ូតូតែម្នាក់ឯងតាមបណ្ដោយផ្លូវលេខ១៩៧៨ ក្នុងទិសដៅពីលិចទៅកើតដោយមានល្បឿនលឿនគួរសមស្របពេលមេឃកំពុងតែភ្លៀងផង ខណៈមកដល់ចំណុចកើតហេតុក៏ស្រាប់តែមានជនសង្ស័យ២នាក់បានជិះម៉ូតូប្រដេញតាមជនរងគ្រោះពីក្រោយរួចហើយក៏ធ្វើសកម្មភាពឆក់យកកាបូបស្ពាយចំហៀងពីស្ត្រីរងគ្រោះ បណ្តាលឲ្យស្ត្រីរងគ្រោះធ្លាក់ពីលើម៉ូតូដួលបោកក្បាលទៅនឹងថ្នល់ស្លាប់ភ្លាមៗនៅនឹងកន្លែង។ បន្ទាប់ពីធ្វើសកម្មភាពឆក់កាបូបបានហើយក្រុម ជនសង្ស័យបានបន្ថែមល្បឿនរត់គេចខ្លួនបាត់ស្រមោលទៅ ។
បន្ទាប់ពីពេលកើតហេតុ សពស្ត្រីរងគ្រោះ សមត្ថកិច្ចបានធ្វើតេស្តសំណាករួចចេញលទ្ធផលគឺអវិជ្ជមាន។ ក្រោយមកសពជនរងគ្រោះត្រូវបានសមត្ថកិច្ចដឹកយកទៅតម្កល់នៅវត្តទឹកថ្លាជាបណ្តោះអាសន្ន ដើម្បីរង់ចាំសាច់ញាតិមកទទួលយកទៅធ្វើបុណ្យនៅពេលក្រោយ។ ចំណែកម៉ូតូសមត្ថកិច្ចបានយកទៅរក្សាទុកបណ្តោះអាសន្ននៅអធិការដ្ឋានខណ្ឌសែនសុខ៕
ដោយ៖ ជ្រោយពេជ្រ
