ខេត្តស្វាយរៀង៖ មានគ្រោះថ្នាក់ចរាចរណ៍រវាងរថយន្តកុងតឺន័រពន្លះជាមួយម៉ូតូវីវ៉ាពីក្រោយពេញទំហឹង បណ្តាលឲ្យជនរងគ្រោះបែកក្បាលធ្ងន់កាលពីវេលាម៉ោង៧និង៤០នាទីយប់ ថ្ងៃទី៣០ ខែមីនា ឆ្នាំ២០១៦ នៅលើកំណាត់ផ្លូវជាតិលេខ១ ចំណុចផ្លូវកោងខាងមុខទីស្នាក់ការកាកបាទក្រហមកម្ពុជា សាខាខេត្តស្វាយរៀង ស្ថិតនៅភូមិសួនថ្មី សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង ។
សមត្ថកិច្ចនគរបាលបានអោយដឹងថា ជនរងគ្រោះឈ្មោះសុខ សុជាតិ ភេទប្រុស អាយុ៣៧ឆ្នាំ មានទីលំនៅភូមិរូបគោ សង្កាត់ព្រៃឆ្លាក់ ក្រុងស្វាយរៀង រងរបួសបែកក្បាលពីក្រោយធ្ងន់ និងដាច់មេជើង និងម្រាមជើងខាងស្តាំ រលាត់ដៃជើងដងខ្លួនសន្លប់នៅក្នុងថ្លុកឈាម ។
បើតាមសមត្ថកិច្ចបានឲ្យដឹងថា មុនពេលកើតហេតុ គេឃើញជនរងគ្រោះជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ស្វាយរៀង 1F1345 បើកបរពីទឹសខាងកើតទៅលិច (ចេញពីដេប៉ូឈើភូមិបាក់រនាស់ សង្កាត់សង្ឃ័រ ក្រុងស្វាយរៀង) មកផ្ទះ លុះមកដល់ចំណុចកើតហេតុខាងលើ ស្រាប់តែមានរថយន្តកុងតឺន័រសណ្តោងរ៉ឺម៉កមួយគ្រឿងពណ៍ខៀវ ពាក់ស្លាកលេខ ភ្នំពេញ 3A7452 សណ្តោងរ៉ឺម៉កពាក់ស្លាកលេខ ភ្នំពេញ 4A 0178 បើកស្របទឹសគ្នាពីកើតមកលិចដែរ បើកយ៉ាងលឿនដល់ចំណុចផ្លូវកោង ក៏ជ្រុលចង្កូតទៅបុកម៉ូតូជនរងគ្រោះពីក្រោយពេញទំហឹងលាន់ដូចរន្ទះប៉ើជាង១០ម៉ែត្រទៅបុកបង្គោលថ្ម
បង្ហាញចរាចរណ៍រួចខ្ទាតមកចូលរថយន្តវិញ អូសម៉ូតូ និងមនុស្សជិត១០ម៉ែត្រ ទើបរបូតចេញបណ្តាលឲ្យជនរងគ្រោះរបួសធ្ងន់សន្លប់នៅនឹងកន្លែង រីឯម៉ូតូខូខាតយ៉ាងដំណំ ។
រីឯអ្នកបើករថយន្តបានបើកទៅមុខចំងាយ៤គីឡូម៉ែត្រ ទើបនគរបាលស្ទាក់ចាប់បាននៅខាងមុខប៉ុស្តិ៍ ស្ថិតនៅភូមិទទា សង្កាត់ចេក ក្រុងស្វារៀង ។ សមត្ថកិច្ចបន្តថា គ្រោះថ្នាក់ចរាចរណ៍នេះមូលហេតុអ្នកបើកបររថយន្តកុងតឺន័របើកបរល្បឿនលឿនខ្វះការប្រុងប្រយ័ត្ន ៕
ដោយ៖ យឹម សុថា
