រុស្ស៊ីបានស្នើដល់ស្ថានទូតអាមេរិកប្រចាំនៅទីក្រុងមូស្គូ ដកតំណែងមន្ត្រីការបរទេស ៣រូបដែលបានលួចទ្រព្យសម្បត្តិរបស់ពលរដ្ឋរុស្ស៊ីក្នុងពេលស្រវឹងស្រា ។ ប្រសិនបើអាមេរិកមិនដោះស្រាយទេនោះ រុស្ស៊ីនឹងបណ្តេញបុគ្គលិកស្ថានទូតទាំង៣រូបនោះចេញជាបន្ទាន់។

សារព័ត៌មាន Interfax បានដកស្រង់ប្រភពព័ត៌មាន បានឲ្យដឹងថា ពលរដ្ឋអាមេរិក៣រូបធ្វើការក្នុងស្ថានទូតអាមេរិក ក្នុងទីក្រុងមូស្គូ រងការចោទប្រកាន់លួចវ៉ាលីរបស់ពលរដ្ឋរុស្ស៊ីកាលពីថ្ងៃទី១៨ខែកញ្ញាក្នុងពេលស្រវឹងស្រា។
មន្ត្រីប៉ូលិសរុស្ស៊ីបានកំណត់អត្តសញ្ញាណថា ជនសង្ស័យ៣រូបជា ទាហានជើងទឹកវាយឡើងគោកអាមេរិក ធ្វើការជាបុគ្គលិកសន្តិសុខការពារស្ថានទូតអាមេរិកមានអាយុប្រមាណ២០ឆ្នាំ។ នៅក្នុងលិខិតផ្ញើរទៅកាន់ស្ថានទូតអាមេរិក នាថ្ងៃទី៨ខែតុលា ក្រសួងការបរទេសរុស្ស៊ី ស្នើដល់ភាគីអាមេរិក ដកទាហានទាំង៣រូបនោះចេញពីប្រទេសរុស្ស៊ី បើមិនដូច្នោះទេទីក្រុងមូស្គូនឹងចោទប្រកាន់ទោស ហើយបណ្តេញចេញពីទឹកដីរុស្ស៊ីភ្លាមៗនោះ។
ទំនាក់ទំនងរវាងអាមេរិកនិងរុស្ស៊ីប្រឈមមុខតានតឹងរយៈពេលកន្លងមក ក្រោយទីក្រុងមូស្គូ និងទីក្រុងវ៉ាស៊ីនតោនប្រឈមមុខតានតឹង ក្នុងទំនាក់ទំនងការបរទេស។ កាលពីដើមសប្តាហ៍កន្លងមក តំណាងរាស្ត្រអាមេរិកមួយក្រុម បានចុះហត្ថលេខា លើលិខិតផ្ញើទៅកាន់ប្រធានាធិបតីបៃឌិន ស្នើបណ្តេញបុគ្គលិកន្ត្រីការទូតរុស្ស៊ី៣០០នាក់ ប្រសិនបើរុស្សីមិនផ្តល់ទិដ្ឋាការដល់មន្ត្រីការបរទេសអាមេរិកនោះ៕

ដោយ៖សាធី

ស្ថានទូតអាមេរិកនៅទីក្រុងម៉ូស្គូប្រទេសរុស្ស៊ី។ (ប្រភពរូប៖ AFP)