ខេត្តកណ្ដាល៖ នគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្ដាល សហការជាមួយកម្លាំងនគរបាលនៃអធិការដ្ឋាននគរបាលស្រុកមុខកំពូល និងកម្លាំងនៃអធិការដ្ឋាននគរបាលស្រុកអង្គស្នួលចុះស្រាវជ្រាវមុខសញ្ញាលួចគាស់ហាងយីហោ សន្យា.ឈានដល់ឃាត់ខ្លួនបានក្រុមជនសង្ស័យ២នាក់ និងដកហូតសម្ភារ:មួយចំនួន។ ប្រតិបត្តិការចាប់ខ្លួននេះ ធ្វើឡើងនៅថ្ងៃទី២០ ខែតុលា.ឆ្នាំ២០២១ ដែលករណីនេះ បានកើតឡើងកាលពីថ្ងៃទី០២ ខែតុលា ឆ្នាំ២០២១ វេលាម៉ោង២៤និង៤៥នាទី រំលងអាធ្រាត នៅចំណុចក្នុងហាងយីហោ សន្យា ស្ថិតនៅក្នុងភូមិព្រែកសំរោង សង្កាត់តាខ្មៅ ក្រុងតាខ្មៅខេត្តកណ្តាល។
មន្ត្រីនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្ដាលបានឲ្យដឹងថា ជនរងគ្រោះឈ្មោះ ឃិន សុផល ភេទប្រុស អាយុ៣៩ឆ្នាំ លក់ដូរ ទីលំនៅភូមិអូរបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ចំណែកជនសង្ស័យចំនួន២នាក់ ទី១.ឈ្មោះ គង់ ដាវី ហៅមាស សុវណ្ណារិទ្ធ ហៅ ផល ភេទប្រុស អាយុ៤២ឆ្នាំ ទីលំនៅភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញនិងទី២. ឈ្មោះ ចាន់ សុធី ហៅ វ៉ា ភេទប្រុស អាយុ៣៤ឆ្នាំ មានទីលំនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។ ដោយឡែកសម្ភារៈបាត់បង់រួមមាន៖ ម៉ាស៊ីនឌីជេ ចំនួន01គ្រឿង,ធុងបាសធំ(សាហ្វ)01គ្រឿង,បាស់សូឡូ ចំនួន 01គ្រឿង,ម៉ិចស៊រសំលេង 01គ្រឿង.សរុបទឹកប្រាក់ប្រហែល 10.000ដុល្លារសហរដ្ឋអាមេរិក.រីឯវត្ថុតាងចាប់យកមាន រថយន្តម៉ាក KIA CARNIVAL ពណ៌ខ្មៅ សេរីឆ្នាំ២០១៩ មិនមានស្លាកលេខ,ធុងបាស០១គ្រាប់,ម៉ាសុីនចាក់ឌីជេ ១គ្រាប់,កន្ត្រៃកាត់ដែក ពណ៌បៃតង ប្រវែង១ម៉ែត្រ,មេសោរសូឡេច ០១, ស្ព្រាយបាញ់ទ្វារ ០១កំប៉ុង ។
បច្ចុប្បន្ន ករណីនេះការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿង ចាត់ការតាមនីតិវិធី៕
ដោយ៖ ស្អាងជ័យ
