ខេត្តបាត់ដំបង៖ បន្ទាប់ពីទទួលបានពត៌មានភ្លាមកម្លាំងនគរបាលជំនាញបានតាមយ៉ាងប្រកៀកប្រកិតហើយឈានដល់ការឃាត់ខ្លួនជនសង្ស័យម្នាក់ ខណៈលួចយករថយន្តមួយគ្រឿងពេលម្ចាស់ចតទុកភ្លេចដកសោរចេញ។
លោកឈឿង គឹមសុង នាយការិយាល័យគរបាលព្រហ្មទណ្ឌកម្រិតស្រាលបានឲ្យដឹងនៅព្រឹកថ្ងៃទី២៧ ខែតុលា ឆ្នាំ២០២១នេះថាដោយមានការណែនាំពីលោកស្នងការកម្លាំងរបស់លោកបាន អនុវត្តវិធានការទប់ស្កាត់បទល្មើសគ្រប់ប្រភេទក្រោមការដឹកនាំបញ្ជាផ្ទាល់របស់ លោកឧត្ដមសេនីយ៍ ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ។
ជាក់ស្តែងកាលពីថ្ងៃទី ២៦ ខែតុលា ឆ្នាំ ២០២១ម្សិលមិញនេះ លោកបានដឹកនាំកម្លាំងនិងក្រុមអន្តរាគមន៍ បង្កា បង្ក្រាប ចុះទប់ស្កាត់បទល្មើសលួចរថយន្តមួយករណី ដោយបាននាំខ្លួនជនសង្ស័យម្នាក់ មកសាកសួរបន្ថែមនៅការិយាល័យជំនាញ។
លោកឈឿងគឹម សេងប្រធានការិយ៉ាល័យព្រហ្មទណ្ឌកម្រិតស្រាលបានឲ្យដឹងថាជនសង្ស័យមានឈ្មោះហួន សុខហេង ភេទប្រុស អាយុ២៨ ឆ្នាំ មានទីលំនៅភូមិជុកក្រៅ ឃុំជុក ស្រុកត្បូងឃ្មុំ ខេត្តត្បូងឃ្មុំ ។ចំណែកឯជនរងគ្រោះមានឈ្មោះហួយ គីម ហ៊ន ភេទប្រុស អាយុ២៣ឆ្នាំ រស់នៅក្នុងភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង។
លោក ឈឿង គឹមសុង បន្តថា នៅថ្ងៃកើតហេតុវេលាម៉ោងប្រមាណជាង ១:០០នាទី ថ្ងៃទី ២៦ ខែតុលា ឆ្នាំ ២០២១ ជនរងគ្រោះបានបើករថយន្ត្តមួយគ្រឿង ម៉ាក Mitsubishi Triton ពណ៌ស ស៊េរីឆ្នាំ២០០២ ពាក់ស្លាកលេខ បាត់ដំបង ២A-៨៦៨៣ ទៅចតទុកនៅទីតាំងមួយស្ថិតក្នុងភូមិរំចេក៥ សង្កាត់រតនៈ ដើម្បីចូលសាកសួរទិញត្រាក់ទ័រ ប៉ុន្តែមិនបានដកសោរថយន្តចេញទេ ហើយជនបង្កឃើញឱកាសល្អបែបនេះក៏បានឡើងរថយន្ត រួច បើករត់ចេញពីកន្លែងកើតហេតុតែម្តង។
លោកបន្តថាក្រោយមានការឆោឡោឡើងជនរងគ្រោះបានរាយការណ៍ដល់សមត្ថកិច្ច ហើយសមត្ថកិច្ចជំនាញបានចេញអន្តរាគមន៍ភ្លាមៗតែម្តងដោយតាមប្រកៀកប្រកិតរហូតដល់ចំណុចជិតរង្វង់មូលនាងរំសាយសក់ ទើបបង្ក្រាបឃាត់ខ្លួនទាំងជនសង្ស័យ ជាមួយនឹងរថយន្តរបស់ជនរងគ្រោះបានទាំងអស់។
បច្ចុប្បន្ន ការិយាល័យជំនាញកំពុងកសាងសំណុំរឿង ដើម្បីអនុវត្តតាមនីតិវិធីបញ្ជូនជនសង្ស័យទៅតុលាការចាត់ការតាមផ្លូវច្បាប់៕
ដោយ៖ អរុណរះ
