ខេត្តស្វាយរៀង៖ មានករណីគ្រោះថ្នាក់ចរាចរណ៍គួរអោយរន្ធត់ដោយសារអ្នកបើករថយន្តដឹកស្រូវសង្ស័យងងុយដេកបុកចូលផ្ទះប្រជាពលរដ្ឋ ២គ្រួសារបណ្ដាលឲ្យខូចខាតរថយន្តនិងសម្ភារៈមួយចំនួនសំណាងមិនមានគ្រោះថ្នាក់ដល់អាយុជីវិត។

ហេតុការណ៍នេះបានកើតឡើងកាលពីវេលាម៉ោង១និង៥នាទីយប់ឈានចូលថ្ងៃទី១៣ខែធ្នូឆ្នាំ២០២១នៅត្រង់ចំណុចភូមិតាត្រាវឃុំកំពង់ត្រាច ស្រុករមាសហែកខេត្តស្វាយរៀង។

សមត្ថកិច្ចនគរបាលស្រុកបានឲ្យដឹងថាបុរសដែលបើករថយន្តបង្កហេតុត្រូវបានស្គាល់ឈ្មោះពៅ ទីបេ  អាយុ ២១ឆ្នាំ មុខរបរ អ្នកបើកបរ រស់នៅភូមិកំចាយមាខាងជើង ឃុំក្រញូង ស្រុកកំចាយមា ខេត្តព្រៃវែងបើករថយន្តម៉ាក
ហុីយាន់ដាយ ពណ៌ស  ពាក់ស្លាកលេខព្រះសីហនុ ៣A៦៧៤២ខូចខាតយ៉ាងដំណំ។

ចំណែកម្ចាស់ផ្ទះរងគ្រោះមានឈ្មោះម៉ា ប៊ុន្ធី ភេទប្រុសអាយុ៤៤ឆ្នាំ មុខរបរកសិករ រស់នៅភូមិតាត្រាវ ឃុំកំពង់ត្រាចស្រុករមាសហែកដោយខូចខាតសម្ភារ:រួមមាន:
ដំបូលផ្ទះលក់ដូរនិងទ្វារដែកខាងមុខខូចទាំងស្រុង តុបាយចំនួន២ ។

និងម្ចាស់ផ្ទះទី២មានឈ្មោះ មុី សាន ភេទប្រុស អាយុ៤១ឆ្នាំមុខរបរ គ្រូបង្រៀន រស់នៅភូមិតាត្រាវ ឃុំកំពង់ត្រាចស្រុករមាសហែក ខេត្តស្វាយរៀង ខូចខាតសម្ភារ:រួមមាន:បាក់ជញ្ជាំងថ្មមួយផ្ទាំងកំពស់មួយម៉ែត្រ បណ្តោយ៥ម៉ែត្រ  បាក់ទ្វារដែកខូចទាំងស្រុង និងរថយន្តម៉ាកតាកូម៉ាមួយគ្រឿងពណ៌ស ពាក់ស្លាកលេខ ស្វាយរៀង២A១៧០១រងការខូចខាត ផតកន្ទុយស្តាំខាងក្រោយ។

តាមសាក្សីបានអោយមុនដឹងថាមានរថយន្តដឹកស្រូវមួយគ្រឿងម៉ាកហុីយាន់ដាយ ពណ៌ស  ពាក់ស្លាកលេខព្រះសីហនុ ៣A៦៧៤២ដោយធ្វើដំណើរ
ពីទិសខាងជើងទៅត្បូងខណះនោះមិនដឹងយ៉ាងម៉េចស្រាប់តែរ៉េចង្កូតបុក
បុកចូលផ្ទះប្រជាពលរដ្ឋបង្កការភ្ញាក់ផ្អើលដល់អ្នកភូមិទាំងកណ្ដាលយប់តែម្ដង។

សមត្ថកិច្ចបញ្ជាក់ថាក្នុងករណីនេះពិតជាសំណាងណាស់មិនបណ្ដាលអោយមានគ្រោះថ្នាក់ដល់មនុស្សនោះទេដោយសារមូល មូលហេតុអ្នកបើកបររថយន្តងងុយ ដេក៕

ដោយ៖ យឹម  សុថាន