ភ្នំពេញ៖ ជាគ្រោះថ្នាក់ដែលនឹកស្មានមិនដល់ ព្រោះតែមួយប៉ប្រិចភ្នែកប៉ុណ្ណោះធ្វើឱ្យគ្រួសារមួយបាត់បង់សមាជិកគួរឱ្យតក់ស្លុតបំផុតនៅក្នុងករណីគ្រោះថ្នាក់ចរាចរណ៍។
ប្រជាពលរដ្ឋដែលឃើញហេតុការណ៍បានឱ្យដឹងថា ប្តីប្រពន្ធដឹកត្រីគ្រប់ប្រភេទតាមម៉ូតូសណ្តោងរ៉ឺម៉កចេញពីផ្សារព្រែកព្នៅក្នុងគោលបំណងយកទៅលក់នៅផ្សារច្បារអំពៅ ត្រូវរថយន្តមិនចាំម៉ាកមួយគ្រឿងបើកកៀរ បណ្តាលឱ្យធ្លាក់ប្រពន្ធពីលើរុឺម៉កដួលបែកក្បាលស្លាប់ភ្លាមៗ ចំណែកប្តីរងរបួសស្រាល ហើយ រថយន្តបង្កហេតុបានបើកគេចបាត់ទៅ ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី២៤ ខែធ្នូ ឆ្នាំ២០២១ នៅតាមបណ្តោយផ្លូវលេខ៥៩៨ កែងផ្លូវជាតិលេខ៥ ស្ថិតក្នុងសង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ ។
ស្ត្រីរងគ្រោះត្រូវបានគេស្គាល់ឈ្មោះ ស្រី ចិន អាយុ២៧ឆ្នាំ ស្នាក់នៅភូមិព្រៃល្វា ខណ្ឌព្រែកព្នៅ រាជធានីភ្នំពេញ ចំណែកបុរសជាប្តីមិនស្គាល់ឈ្មោះនោះទេ ។
តាមប្រភពពីជនរងគ្រោះជាប្តីបានប្រាប់ឱ្យដឹងថា មុនពេលកើតហេតុ គាត់និងប្រពន្ធបានដឹកត្រីតាមរុឺម៉កម៉ូតូចេញពីផ្សារព្រែកព្នៅ ក្នុងគោលបំណងយកទៅលក់នៅផ្សារច្បារអំពៅ ខណៈគាត់ធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីជើងទៅត្បូងមកដល់កន្លែងកើតហេតុក៏បត់ស្តាំចូលផ្លូវលេខ៥៩៨ ភ្លាមៗនោះក៏
វាក់អឺគ្នាជាមួយនឹងរថយន្តដឹកទំនិញមួយគ្រឿងមិនចាំម៉ាកដែលធ្វើដំណើរចេញពីផ្លូវលេខ៥៩៨ បញ្ច្រាសទិសដៅគ្នាគាត់ក៏ប្រឹងងាកចង្កូតគេចអែបមកខាងឆ្វេងដៃដែរ តែមិនផុតក៏ត្រូវរថយន្តនោះកៀរយ៉ាងពេញទំហឹងបណ្តាលឱ្យរុឺម៉កម៉ូតូខ្ទាតទៅកៀនធ្លាក់ប្រពន្ធពីលើរុឺម៉កដួលបែកក្បាលស្លាប់ភ្លាមៗ ចំណែកគាត់ជាអ្នកបើករុឺម៉កម៉ូតូរងរបួសស្រាល ។ ដោយឡែកម៉ូតូសណ្តោងរុឺម៉ករងការខូចខាតមួយកំណាត់មុខ។ បន្ទាប់ពីបង្កហេតុ រថយន្ដបង្កមិនឈប់ទទួលខុសត្រូវនោះទេ បានបន្ថែមល្បឿនបើកគេចតាមផ្លូវជាតិលេខ៥ សំដៅទៅខណ្ឌព្រែកព្នៅបាត់ស្រមោលទៅ ។
ក្រោយកើតហេតុ សពស្ត្រីរងគ្រោះត្រូវបានសមត្ថកិច្ចធ្វើឯកសារបញ្ជាក់ និងប្រគល់ឱ្យសាច់ញាតិចាត់ចែងយកទៅធ្វើបុណ្យតាមប្រពៃណី ។ ចំណែកបុរសជាប្តីបានដាក់ពាក្យបណ្ដឹងទៅសមត្ថកិច្ចជំនាញ និងប្រគល់រុឺម៉កម៉ូតូឱ្យសមត្ថកិច្ចយកទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនៅពេលក្រោយ ៕
ដោយ៖ អរុណរះ
