ភ្នំពេញ៖ ជនសង្ស័យម្នាក់ក្នុងចំណោមបក្ខពួក២នាក់ ត្រូវបាននគរបាលល្បាតខណ្ឌពោធិ៍សែនជ័យឃាត់ខ្លួន បន្ទាប់ពីពួកគេបានធ្វើសកម្មភាពលួចឡើងលើផ្ទះប្រជាពលរដ្ឋប៉ុនប៉ងចូលលួចទ្រព្យសម្បត្តិ កាលពីវេលាម៉ោង២ទៀបភ្លឺ ថ្ងៃទី១៨ ខែមេសា ឆ្នាំ២០១៦ ស្ថិតក្នុងបុរីញូវថោន សង្កាត់ចោមចៅ ខណ្ឌពោធិ៍សែន រាជធានីភ្នំពេញ ។
ជនសង្ស័យឈ្មោះ ទ្រី សុខ ភេទប្រុស អាយុ២៣ឆ្នាំ ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែន ចំណែកបក្ខពួកម្នាក់ទៀត ដែលចូលរួមធ្វើសកម្មភាពបានគេចខ្លួនបាត់ ។
នគរបាលបានអោយដឹងថា នៅមុនពេលកើតហេតុ កម្លាំងបានជិះម៉ូតូល្បាតក្នុងមូលដ្ឋានដើម្បីការពារជូនប្រជាពលរដ្ឋ ខណៈកំពុងល្បាត ស្រាប់តែប្រទះឃើញជនសង្ស័យ២នាក់កំពុងធ្វើសកម្មភាពឡើងចូលក្នុងផ្ទះប្រជាពលរដ្ឋប៉ុនប៉ងចូលលួចទ្រព្យសម្បត្តិភ្លាមនោះកម្លាំង ក៏បានឃាត់ខ្លួនបានម្នាក់ចំណែកម្នាក់ទៀតរត់គេចខ្លួនបាត់តែម្តង ។
នៅចំពោះមុខនគរបាលជនសង្ស័យបានសារភាពថា ខ្លួនបានធ្វើសកម្មភាពលួចគាស់ផ្ទះរបស់ប្រជាពលរដ្ឋជាច្រើនមកហើយរហូតមកដល់យប់កើតហេតុ ទើបកម្លាំងនគរបាលឃាត់ខ្លួនបានតែម្តង ។
បច្ចុប្បន្ន ជនសង្ស័យកំពុងសាកសួរនៅនគរបាលរដ្ឋបាលប៉ុស្តិ៍ចោមចៅ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌពោធិ៍សែនជ័យដើម្បីចាក់ការតាមផ្លូវច្បាប់។ ចំណែកម្នាក់ទៀតកំពុងស្រាវជ្រាវតាមចាប់យកមកផ្តន្ទាទោសតាមច្បាប់ ៕
ដោយ៖ សុខាសែនជ័យ
