ភ្នំពេញ៖ បុរស៣នាក់ជិះម៉ូតូម៉ាកCBRមួយគ្រឿងឌុបគ្នាក្នុងល្បឿនលឿនបានជ្រុលបុករះម៉ូតូ២គ្រឿងខណៈកំពុងធ្វើដំណើរបណ្តាលឲ្យរបួសធ្ងន់ស្រាល៥នាក់។

ហេតុការណ៍​នេះ​បាន​កើតឡើង​កាលពីវេលាម៉ោង​១រំលងអាធ្រាត្រឈានចូលថ្ងៃទី២០ ខែមេសា ឆ្នាំ​២០១៦​ នៅចំណុចផ្លូវលេខ៣៦០កែងផ្លូវលេខ១៤៣​ ស្ថិតក្នុងសង្កាត់បឹកកេងកងទី៣​ ខណ្ឌចំការមន។

តាមសាក្សីនៅកន្លែងកើតហេតុបានឲ្យដឹងថា​ នៅមុនពេលកើតហេតុគេបានឃើញម៉ូតូ២គ្រឿងដោយមួយគ្រឿងម៉ាកឌ្រីមសងស៊េរីឆ្នាំ២០១៤​ ពណ៌ខ្មៅ​ពាក់ស្លាកលេខភ្នំពេញ1CG-6764​ បើកបរដោយបុរសម្នាក់ និងមួយគ្រឿងទៀតម៉ាកធូដេ ពណ៌ខៀវលាយស ពាក់ស្លាកលេខភ្នំពេញ1CM-8078 បើកបរដោយនារីម្នាក់​ ធ្វើដំណើរតាមបណ្តោយផ្លូវលេខ១៤៣​ ក្នុងទិសដៅពីជើងទៅត្បូងខណៈមកដល់ចំណុចកើតហេតុស្រាប់តែមានយុវជន៣នាក់ជិះម៉ូតូធំមួយគ្រឿងម៉ាកCBR ពណ៌​សលាយខ្មៅ​ ពាក់ស្លាកលេខសៀមរាប​ 1M-3366 ធ្វើដំណើរតាមបណ្តោយផ្លូវលេខ៣៦០​ ក្នុងទិសដៅពីកើតទៅលិចក្នុងល្បឿនលឿនបានជ្រុលបុករះម៉ូតូទាំង២គ្រឿងបណ្តាលឲ្យនារីជិះម៉ូតូធូដេរងរបួសធ្ងន់ធ្ងរ ចំណែកម្ចាស់ម៉ូតូឌ្រីមសងរបួសស្រាល រីឯអ្នកជិះម៉ូតូCBRរងរបួសធ្ងន់ទាំង៣នាក់។

ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាម ចំណែកម៉ូតូទាំង៣គ្រឿងត្រូវបានសមត្ថកិច្ចចុះធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនដើម្បីរងចាំដោះស្រាយពេលក្រោយ៕

ដោយ៖ ជីម ភារ៉ា ដង្កោ