ភ្នំពេញ : ទីស្តីការក្រសួងយុត្តិធម៌, នាព្រឹក ថ្ងៃព្រហស្បតិ៍ ៣ រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២០ ខែមករា ឆ្នាំ២០២២ នេះ, លោក កើត រិទ្ធ រដ្ឋមន្រ្តីក្រសួងយុត្តិធម៌ បានអញ្ជើញដឹកនាំកិច្ចប្រជុំដំបូង នៃក្រុមការងាររបស់ក្រសួងយុត្តិធម៌ប្រឆាំងនឹងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ដែលមាន ការចូលរួមពីសមាជិក-សមាជិកានៃក្រុមការងារនេះ ដែលសុទ្ធសឹងជាថ្នាក់ដឹកនាំ និងមន្ត្រីរាជការ នៃក្រសួងយុត្តិធម៌, សមាជិកនៃក្រុមប្រឹក្សានីតិកម្មនិងយុត្តិធម៌នៃក្រសួងយុត្តិធម៌, ចៅក្រមនៃ សាលាដំបូងរាជធានីភ្នំពេញ និងព្រះរាជអាជ្ញារងនៃអយ្យការអមសាលា ដំបូង រាជធានីភ្នំពេញ។
នៅក្នុងកិច្ចប្រជុំលើកដំបូងនេះ, លោករដ្ឋមន្ត្រី បានណែនាំចង្អុលបង្ហាញទិសដៅ និងបែងចែកតួនាទីភារកិច្ចក្នុងការសម្របសម្រួលជាមួយក្រសួង-ស្ថាប័នពាក់ព័ន្ធ, អប់រំនិងបណ្តុះបណ្តាល និងជំរុញការអនុវត្តពាក់ព័ន្ធនឹងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងច្បាប់ស្តីពីការប្រឆាំងហិរញ្ញប្បទាន ដល់ការរីកសាយភាយ អាវុធមហាប្រល័យ ព្រមទាំងលិខិតបទដ្ឋានគតិយុត្តពាក់ព័ន្ធផ្សេងទៀត។ ទន្ទឹមនេះ, លោករដ្ឋមន្ត្រី បានធ្វើការណែនាំដល់សមាជិក-សមាជិកា នៃក្រុមការងារឱ្យបំពេញភារកិច្ច ប្រកបដោយស្មារតីបុរេសកម្ម និងទទួលខុសត្រូវខ្ពស់ ដើម្បីបុព្វហេតុជាតិ និងមាតុភូមិ។
ក្រុមការងារនេះត្រូវបានបង្កើតឡើងដោយសេចក្តីសម្រេចលេខ ០៤ កយ.សសរ/២២ ចុះថ្ងៃទី១៨ ខែមករា ឆ្នាំ២០២២ របស់ក្រសួងយុត្តិធម៌ ដែលមានតួនាទី និងភារកិច្ចក្នុងការដឹកនាំ តាមដាន ត្រួតពិនិត្យ និងជំរុញការអនុវត្តច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម និងច្បាប់ស្តីពីការប្រឆាំងហិរញ្ញប្បទានដល់ការរីកសាយ ភាយអាវុធមហាប្រល័យ ដែលស្ថិតក្រោមដែនសមត្ថកិច្ចរបស់ក្រសួងយុត្តិធម៌, ប្រមូល និងចងក្រងទិន្នន័យពាក់ព័ន្ធនឹង ការស៊ើបអង្កេត ការចោទប្រកាន់ ការស៊ើបសួរ ការផ្តន្ទាទោស និងការរឹបអូសទ្រព្យសម្បត្តិដែល ពាក់ព័ន្ធនឹងបទល្មើសសម្អាតប្រាក់, ការជំរុញ និងពង្រឹងការស៊ើបអង្កេត ការចោទប្រកាន់ ការស៊ើបសួរ និងការផ្តន្ទាទោសបទល្មើសសម្អាតប្រាក់ និងតួនាទីភារកិច្ចផ្សេងទៀតដូចមាន កំណត់ក្នុងសេចក្តីសម្រេច ៕
ដោយ : សុខ ខេមរា
