ខេត្តមណ្ឌលគិរី៖ មកទល់ពេលនេះក្មេងម្នាក់ដែលរួចជីវិតក្នុងករណីឃាតកម្មមួយគ្រួសារនោះ គឺស្ថានភាពនៅពេលនេះមិនទាន់បានធូរស្បេីយនៅឡេីយទេ ព្រោះរងរបួសធ្ងន់ត្រង់ក និងក្បាល ព្រោះត្រូវរងនឹងការវាយដោយវត្ថុរឹង ក្នុងនោះយេីងឃេីញវត្តមានរបស់លោកឧត្ដមសេនីយ៍ទោ ជាវ វិបុល អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និង កម្លាំងជំនាញ CPU ចុះសួរសុខទុក្ខនិង ប្រមូលព័ត៌មានមួយចំនួនរហូតឈានដល់ការបង្រ្កាបក្រុមឃាតកមួយក្រុមបានសម្រេច។
សមត្ថកិច្ចនគរបាលនៃស្នងការដ្ឋាននគរបាលខេត្តមណ្ឌលគិរីបានស្រាវជ្រាវឈានទៅឃាត់ខ្លួនជនសង្ស័យចំនួន៦នាក់ជាបន្តបន្ទាប់ពាក់ព័ន្ធនឹងករណីឃាតកម្មគិតទុកជាមុនលើគ្រួសារមួយនៅក្នុងស្រុកពេជ្រាដា កាលពីថ្ងៃទី១ ខែកុម្ភៈ ឆ្នាំ២០២២ វេលាម៉ោង១១:៣០នាទី បណ្តាលឱ្យមនុស្សក្មេងចាស់ចំនួន៥នាក់ ស្លាប់ និងក្មេងប្រុស១នាក់រងរបួស នៅចំណុចស្រែចោត ភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី ។
សមត្ថកិច្ចបន្តថា ក្រោយពីមានហេតុការណ៍កើតទ្បើង នាយកដ្ឋាននគរបាលព្រហ្មទណ្ឌ នាយកដ្ឋាននគរបាលបច្ចេកទេសនិងវិទ្យាសាស្ត្រ បានដឹកនាំកម្លាំងទៅសហការជាមួយកម្លាំងជំនាញស្នងការដ្ឋាននគរបាលខេត្តមណ្ឌលគិរី និងមានការចូលរួមពីអង្គការការពារកុមារ CPU ចុះដល់ទីតាំងកើតហេតុ ធ្វើការស្រាវជ្រាវដើម្បីកំណត់អត្តសញ្ញាណជនល្មើសដែលពាក់ព័ន្ធករណីខាងលើ។ រហូតមកដល់ថ្ងៃទី៥ ខែកុម្ភៈ ឆ្នាំ២០២២ ក្រុមការងារបានឈានទៅដល់កំណត់អត្តសញ្ញាណជនសង្ស័យ និងធ្វើការចាប់ខ្លួនបានជាបន្តបន្ទាប់ចំនួន៦នាក់ ក្នុងនោះមានឈ្មោះ ធី ម្ពៀត ហៅ ព្សឹត ភេទប្រុស អាយុ១៨ឆ្នាំ ជនជាតិព្នង (ជនដៃដល់), ឈ្មោះ រឹម ធា ភេទប្រុស អាយុ២៧ឆ្នាំ ជនជាតិខ្មែរ (ជនដៃដល់), ឈ្មោះ នឹម ខ្លាខឹន ភេទប្រុស អាយុ១៨ឆ្នាំ ជនជាតិខ្មែរ
(ជនដៃដល់), ឈ្មោះ ធី ព្យឹត ភេទប្រុស អាយុ១៤ឆ្នាំ ជនជាតិព្នង (ជនដៃដល់), ឈ្មោះ ក្លឹង ចន្ធី ភេទប្រុស អាយុ៤០ឆ្នាំ ជនជាតិព្នង (អ្នកបញ្ជាឱ្យសម្លាប់), ឈ្មោះ នួន វណ្ណា ភេទប្រុស អាយុ៥៤ឆ្នាំ ជនជាតិខ្មែរ (អ្នកបញ្ជាឱ្យសម្លាប់) ។
ក្នុងករណីឃាតកម្មយ៉ាងសាហាវនេះ ជនសង្ស័យខាងលើបានឆ្លើយសារភាពថា ពួកខ្លួនពិតជាបានធ្វើសកម្មភាពបាញ់និងវាយសម្លាប់ទៅលើជនរងគ្រោះទាំង៦នាក់ កាលពីថ្ងៃទី១ ខែកុម្ភៈ ឆ្នាំ២០២២ប្រាកដមែន។ មូលហេតុ ដោយសារគំនុំរឿងចោទប្រកាន់ក្រុមគ្រួសាររងគ្រោះថាបានធ្វើអំពើអាបធ្មប់មកលើគ្រួសារខ្លួន។
បច្ចុប្បន្នជនសង្ស័យខាងលើបានប្រគល់ឱ្យស្នងការដ្ឋាននគរបាលខេត្តកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់៕
ដោយ រ៉ារ៉ា
