ភ្នំពេញ៖ មនុស្សចំនួន ៩នាក់ សុទ្ធតែជាស្រ្តីបានប្រមូលផ្ដុំគ្នាលេងល្បែងស៊ីសងខុសច្បាប់(បៀរ) នៅក្នុងផ្សារចាស់ ត្រូវបានកម្លាំងនគរបាលខណ្ឌដូនពេញ ចុះបង្រ្កាប និងឃាត់ខ្លួនបញ្ជូនទៅសាកសួរនៅអធិការដ្ឋាននគរបាលខណ្ឌ រួមទាំងវត្ថុតាងជាក់ស្ដែង។
យោងតាមរបាយការណ៍របស់អធិការដ្ឋាននគរបាលខណ្ឌ ដូនពេញ បានឱ្យដឹងថា កម្លាំងជំនាញខណ្ឌដូនពេញ បានសហការជាមួយកម្លាំងគណៈបញ្ជាការឯកភាពខណ្ឌដូនពេញ និងគណៈកម្មាការផ្សារចាស់ កាលពីវេលាម៉ោង ៣ និង១០នាទីរសៀលថ្ងៃទី០៩ ខែកុម្ភៈ ឆ្នាំ២០២២ បានបើកកិច្ចប្រតិបត្តិការបង្ក្រាបល្បែងស៊ីសងខុសច្បាប់(ប្រភេទលេងបៀរ) នៅចំណុចតូបលេខ៥២៤, ៥២៥, ៧៣, ៥០២ ក្នុងផ្សារចាស់ សង្កាត់វត្តភ្នំ និងឃាត់ខ្លួនមនុស្សចំនួន០៩នាក់ ព្រមទាំងដកហូតវត្ថុតាង បៀរចំនួន ១៧ហ៊ូ។
ប្រភពដដែលបន្តថា ក្រុមអ្នកលេងល្បែងស៉ីសងខាងលេីនេះ គឺសុទ្ធតែជាអាជីវករលក់ដូរក្នុងផ្សារ នៅពេលដែលពួកគាត់ទំនេរក៏នាំគ្នាលេងល្បែងបង្កឱ្យគ្មានសណ្ដាប់ធ្នាប់ ទេីបអ្នកជិតខាងឃេីញដូច្នេះក៏រាយការណ៍ប្រាប់សមត្ថកិច្ចឱ្យចុះបង្រ្កាបជាក់ស្ដែងតែម្តង។
ក្រោយឃាត់ខ្លួនកម្លាំងជំនាញបញ្ជូនមកសាកសួរ និងធ្វើកិច្ចសន្យាមិនឱ្យមានការជួបជុំគ្នាលេងល្បែងស៉ីសងខុសច្បាប់នេះទៀត រួចអនុញ្ញាតឱ្យត្រឡប់ទៅផ្ទះវិញ ៕
ដោយ៖ស តារា
