ភ្នំពេញ៖ រដ្ឋបាលរាជធានីភ្នំពេញបានបើកការដ្ឋានសាងសង់មណ្ឌលព្យាបាលជំងឺកូវីដ-១៩ តេជោសន្តិភាពរាជធានីភ្នំពេញ ស្ថិតនៅបឹងតាមោក(ទំនប់កប់ស្រូវ) ក្នុងសង្កាត់គោករកា ខណ្ឌព្រែកព្នៅ ក្រោមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលតម្រូវឧិ្យធ្វើការសាងសង់ឱ្យបានរួចរាល់ក្នុងរយៈពេលមួយឆ្នាំ។
នៅរសៀលថ្ងៃទី១៤ កុម្ភៈ ២០២២ ពិធីក្រុងពាលីតាមបែបសាសនាដើម្បីសុំម្ចាស់ទឹកម្ចាស់ដីសាងសង់មណ្ឌលព្យាបាលជំងឺកូវីដ-១៩តេជោសន្តិភាពរាជធានីភ្នំពេញនេះ ត្រូវបានធ្វើឡើងនារសៀលថ្ងៃទី១៤កុម្ភៈនេះ ដោយមានការអញ្ជើញចូលរួមពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកម៉ប់ សារិន ប្រធានក្រុមប្រឹក្សារាជធានីភ្នំពេញ។
តាមការឱ្យដឹងពីមន្ត្រីជំនាញរដ្ឋបាលរាជធានីភ្នំពេញបញ្ជាក់ថា៖ មណ្ឌលព្យាបាលជំងឺកូវីដ-១៩នេះមានឈ្មោះថា តេជោសន្តិភាពរាជធានីភ្នំពេញដែលត្រូវសាងសង់ចំនួន១១អគារលើផ្ទៃដីជាង៧
ហិកតាស្ថិតនៅក្នុងភូមិកប់ស្រូវធំ សង្កាត់គោករកា ខណ្ឌព្រែកព្នៅ ដែលនឹងត្រូវសាងសង់ឱ្យបានរួចរាល់ក្នុងរយៈពេលរវាង១ឆ្នាំ។ ក្រោមអនុសាសន៍របស់សម្តេចតេជោហ៊ុន សែន បានណែនាំឧិ្យមានការសាងសង់មណ្ឌលព្យាបាលជំងឺកូវីដ-១៩ឱ្យបានឆាប់រហ័សដើម្បីបំពេញតម្រូវការចាំបាច់ក្នុងការព្យាបាលអ្នកជំងឺកូវីដ-១៩ ពិសេសក្នុងរាជធានីភ្នំពេញក្នុងពេលដែលជំងឺផ្លូវដង្ហើមដ៏កាចសាហាវនេះ កំពុងរីករាលដាលយ៉ាងឆាប់រហ័សចូលក្នុងសហគមន៍ដោយបានបំប្លែងខ្លួនជាអូមីក្រុងនិងមានការឆ្លងលឿនទៀតផង។ មន្ត្រីសុខាភិបាលបានបង្ហាញក្តីបារម្ភពីការរាលដាលនៃជំងឺដ៏កាចសាហាវនេះ និងបានអំពាវនាវដល់បងប្អូនប្រជាពលរដ្ឋឱ្យខិតខំយកចិត្តទុកដាក់អនុវត្តវិធានការ៣ការពារ ៣កុំឱ្យបានម៉ត់ចត់ និងទៅទទួលវ៉ាក់សាំងការពារជំងឺកូវីដ-១៩ឱ្យបានគ្រប់ដូសនិងដូសជំរុញ។ ការចាប់ផ្តើមដំណើរការសាងសង់មណ្ឌលព្យាបាលជំងឺកូវីដ-១៩នាពេលនេះបានបង្ហាញឱ្យឃើញពីការគិតគូររបស់អាជ្ញាធររាជធានីភ្នំពេញតាមការណែនាំរបស់សម្តេចតេជោដើម្បី ផ្តល់សេវាសុខាភិបាលជូនប្រជាពលរដ្ឋយើងក្នុងដំណាក់កាល នៃការរីករាលដាលជំងឺកូវីដ-១៩ ដែលយើងមិនដឹងថាវានឹងបញ្ចប់នៅពេលណា។ ដូច្នេះយើងត្រូវរៀនរស់តាមរបត់ថ្មីនៃសម័យកូវីដ ហើយអគារមណ្ឌលព្យាបាលជំងឺកូវីដ-១៩នេះក៏ជាសមិទ្ធផលថ្មីដែលនឹងកើតចេញជារូបរាងនៅដើមឆ្នាំ២០២២នេះក្រោមការដឹកនាំរបស់ លោក ឃួង ស្រេង អភិបាលនៃគណៈអភិបាលរាជធានីភ្នំពេញ ៕ . សំរិត
