ភ្នំពេញ៖ បេីតាមការបញ្ជាក់ពីលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) បានថ្លែងនៅលេីបណ្ដាញសង្គមហ្វេសប៊ុកផ្ទាល់ខ្លួននៅរសៀលថ្ងៃអង្គារទី០១ ខែមីនា ឆ្នាំ២០២២នេះថា៖ ស្អែកនេះនៅថ្ងៃទី០២ ខែមីនា ឆ្នាំ២០២២ នៅទីស្ដីការក្រសួងការបរទេស និងសហប្រតិបត្តិការអន្ដរជាតិ ត្រូវចុះហត្ថលេខាលើលិខិតប្ដូរសាររវាងឯកឧត្តមឧបនាយករដ្ឋមន្ត្រីនិងជារដ្ឋមន្ត្រីការបរទេសនិងសហប្រតិបត្តិការអន្តរជាតិជាមួយឯកឧត្តមឯកអគ្គរដ្ឋទូតជប៉ុនប្រចាំកម្ពុជា។
អគ្គនាយកស៊ីម៉ាក់រូបនេះ បានបន្តទៀតថា រដ្ឋាភិបាលជប៉ុនបានសម្រេចផ្ដល់ជំនួយឥតសំណង ជូនរាជរដ្ឋាភិបាលកម្ពុជា គាំទ្រអង្គភាពCMAC សម្រាប់គម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី២ មានថវិកាសរុបចំនួន២.០០០លានយ៉េន ប្រមាណជាង១៧លានដុល្លារអាមេរិក សម្រាប់រយៈពេល៤ឆ្នាំ (០១ មេសា ២០២២- ធ្នូ ២០២៥)។
លោក ហេង រតនា បានគូសបញ្ជាក់ថា គំរោងនេះត្រូវអនុវត្តកិច្ចប្រតិបត្តិការនៅទិសខេត្តបាត់ដំបង៕
ដោយ៖សហការី
