ភ្នំពេញ ៖ រថយន្តToyota Prius ស៊េរីឆ្នាំ២០១៧ បានបុកឡំប្រឺតាដែលកំពុងដឹកអ្នកដំណេីរឆ្លងផ្លូវបំបែកជាបួនបណ្ដាលឲ្យក្រឡាប់ផ្ងារជេីងម្ខាង និងធ្វេីឲ្យបុរសម្នាក់ដែលជាអ្នកដំណេីរជិះលើឡំប្រឺតានោះរងរបួសធ្ងន់។
ហេតុការណ៍នេះបង្កការភ្ញាក់ផ្អេីលដល់ប្រជាពលរដ្ឋកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២ ខែមីនា ឆ្នាំ២០២២ នៅក្បែរផ្សារទួលទំពូង តាមបណ្ដោយផ្លូវលេខ១៥៥ កែងផ្លូវលេខ៤៥៤ ក្នុងសង្កាត់ទួលទំពូងទី១ ខណ្ឌចំការមន ។
តាមប្រភពព័ត៌មានពីប្រជាពលរដ្ឋដែលនៅក្បែរកន្លែងកេីតហេតុបានប្រាប់ឱ្យដឹងថា មុនពេលកេីតហេតុគេឃេីញឡំប្រឺតាពណ៌លឿង ពាក់ស្លាកលេខភ្នំពេញ 1GR-5424 បេីកបរដោយបុរសម្នាក់និងដឹកបុរសម្នាក់ជាភ្ញៀវធ្វេីដំណេីរតាមបណ្ដោយផ្លូវលេខ១៥៥ ក្នុងទិសដៅពីត្បូងទៅជេីងដោយល្បឿនលឿនល្មម និងឆ្លងផ្លូវបំបែបជាបួនត្រង់ចំណុចកេីតហេតុ ខណៈនោះក៏មានរថយន្តមួយគ្រឿងម៉ាក Toyota Prius ស៊េរីឆ្នាំ២០១៧ ពណ៌ស ពាក់ស្លាកលេខភ្នំពេញ 2BN-4878 បេីកបរដោយបុរសម្នាក់បានធ្វេីដំណេីរតាមបណ្ដោយផ្លូវលេខ៤៥៤ពីកេីតទៅលិចក្នុងល្បឿនលឿន និងមិនប្រយ័ត្នបានបុកឡំប្រឺតាចំពីចំហៀងខាងក្រោយផ្នែកខាងស្ដាំ បណ្ដាលឱ្យឡំប្រឺតាក្រឡាប់ផ្ងារជេីងម្ខាង និងធ្វេីឲ្យបុរសម្នាក់ដែលជិះលើឡំប្រឺតានោះរបួសបាក់ដងកាំបិត(ធ្ងន់) រីឯតៃកុងឡំប្រឺតារងរបួសស្រាល ។
ក្នុងហេតុការណ៍គ្រោះថ្នាក់ចរាចរណ៍ខាងលេីនេះ រថយន្តបង្កនិងឡំប្រឺតារងគ្រោះបានរងការខូចខាតជាច្រេីនដូចគ្នា។ ជាមួយគ្នានោះក៏ឃេីញបុរសម្នាក់ដែលជាអ្នកបើករថយន្តខាងលេីបានចុះពីរថយន្តដូចជាស្រវឹងស្រាផងដែរ ។
ក្រោយកេីតហេតុភ្លាម បុរសម្នាក់ដែលជាអ្នកដំណើរជិះឡំប្រឺតារងរបួសធ្ងន់ត្រូវបានរថយន្តសង្គ្រោះបន្ទាន់របស់មន្ទីរពេទ្យឯកជនដឹកយកទៅសង្គ្រោះភ្លាមៗ។ ដោយឡែកឡំប្រឺតានិងរថយន្ត Toyota Prius ខាងលេី ត្រូវបានសមត្ថកិច្ចមូលដ្ឋានទាក់ទងទៅជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វេីការវាស់វែងយកទៅរក្សាទុករង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
