ត្បូងឃ្មុំ ៖ លោក អ៊ាង សុផល្លែត សមាជិកគណៈកម្មាធិការគណបក្សប្រជាជនកម្ពុជា និងជាប្រធានក្រុមការងារគណបក្សចុះ មូលដ្ឋានស្រុកអូររាំងឪ ខេត្តត្បូងឃ្មុំ បានក្រើនរំលឹកសមាជិក-សមាជិកាបក្សទាំង អស់ ឲ្យបន្តគាំទ្រគោលនយោបាយគណ បក្ស ដើម្បីការពារសន្តិភាពឲ្យបានគង់វង្ស តាមរយៈគោលនយោបាយឈ្នះៗ ។ នេះជាប្រសាសន៍លើកឡើងក្នុងឱកាសលោកអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារគណបក្សប្រចាំត្រីមាសទី១ ឆ្នាំ២០២២ និងទិសដៅអនុវត្តបន្តរបស់ក្រុមការងារគណបក្សចុះមូលដ្ឋានស្រុកអូររាំងឪ នាព្រឹកថ្ងៃទី២៦ ខែមីនា ឆ្នាំ២០២២ ។
លោក អ៊ាង សុផល្លែត បានគូសបញ្ជាក់ថា សន្តិភាពពិតជាមានសារៈសំខាន់ណាស់សម្រាប់គ្រប់បណ្តាប្រទេសទាំងអស់ ជាក់ស្តែងសុខសន្តិភាពគឺនាំកម្ពុជាមកនូវការអភិវឌ្ឍរីកចម្រើនលើគ្រប់វិស័យ ប្រជាជនរស់នៅមានភាពសុខសាន្ត ហើយប្រទេសកម្ពុជាមានភាពស្មើមុខស្មើមាត់លើឆាកអន្តរជាតិ ។
លោកប្រធាន បានបន្ថែមថា គណបក្ស ប្រជាជនកម្ពុជាមានគោលនយោបាយត្រឹមត្រូវនិងច្បាស់លាស់ និងបានដាក់ ចេញឲ្យសមាជិក-សមាជិការគណបក្សទាំងអស់អនុវត្តនៅតាមមូលដ្ឋានទូទាំងប្រទេស ដើម្បីជាតិមាតុភូមិនិងប្រជា ពលរដ្ឋ។ លោក អ៊ាង សុផល្លែត ជំរុញលើកទឹកចិត្តឲ្យសមាជិកគណបក្សស្រុកអូររាំងឪ ធ្វើយ៉ាងណាជួយប្រជាពលរដ្ឋក្នុងមូលដ្ឋានឲ្យមានការងារនិងមុខរបរត្រឹមត្រូវ ដើម្បីរកប្រាក់ចំណូលបង្កើនជីវភាពរស់នៅប្រចាំថ្ងៃ ដែលជាគោលនយោបាយអាទិភាពមួយរបស់គណបក្ស ក្នុងការលើកកម្ពស់ជីវភាពនិងកាត់បន្ថយភាពក្រីក្ររបស់ប្រជាពលរដ្ឋ ។ ជាងនេះទៅទៀតសូមឲ្យសមាជិក-សមាជិការគណបក្សទាំងអស់សូមបន្តការធ្វើអំពើល្អជាមួយប្រជាពលរដ្ឋ ដើម្បីដណ្តើមបានប្រៀបឈ្នះក្នុងការបោះឆ្នោតជ្រើស រើសក្រុមប្រឹក្សាឃុំ សង្កាត់ នាពេលខាង មុខ និងការបោះឆ្នោតបន្តបន្ទាប់ទៀត ។
លោកបានសង្កត់ធ្ងន់ថា សូមឲ្យអាជ្ញាធរមានសមត្ថកិច្ចគ្រប់លំដាប់ថ្នាក់ បន្តពង្រឹងការអនុវត្តគោលនយោបាយភូមិឃុំ សង្កាត់ មានសុវត្ថិភាព ការងារសន្តិសុខក្នុងមូលដ្ឋានស្រុកអូររាំងឪ ទប់ស្កាត់ភាពអសកម្ម ល្បែងសុីសងគ្រប់ប្រភេទ ពិសេសគ្រឿងញៀនដែលនាំមកនូវគ្រោះមហន្តរាយដល់ក្រុមគ្រួសារ និងសង្គមជាតិផងដែរ ៕
