ខេត្តកំពង់ស្ពឺ៖ បេីយោងតាមការបញ្ជាក់ពីលោក សៀក រ៉ា នាយប៉ុស្តិ៍នគរបាលរដ្ឋបាលឃុំស្គុះ នៃស្នងការដ្ខាននគរបាលខេត្តកំពង់ស្ពឺ បានឱ្យដឹងថា កាលពីវេលាម៉ោង១១និង៣០នាទីព្រឹកថ្ងៃទី២៣ ខែមេសា ឆ្នាំ២០២២នេះ មានផ្ទះប្រជាពលរដ្ឋចំនួន០៣ខ្នងដែលស្ថិតនៅក្នុងភូមិរើងពើង ឃុំស្គុះ ស្រុកសំរោងទង ខេត្តកំពង់ស្ពឺ ត្រូវបានព្រះអគ្គីឆាបឆេះដោយសារតែឆ្លងចរន្តអគ្គិសនី ខណៈដែលម្ចាស់ផ្ទះចេញទៅប្រកបរបរចិញ្ចឹមជីវិត។
លោកនាយប៉ុស្តិ៍រូបនេះបានបន្ថែមថា ខណៈស្ថានភាពភ្លើងកំពុងតែឆាបឆេះយ៉ាងសន្ធោសន្ធៅនោះ ក្រុមបង្ការពន្លត់
អគ្គិភ័យនៅមិនទាន់គ្រប់គ្រងស្ថានការណ៍នេះបាននៅឡើយទេ។ ភ្លាមនោះរថយន្តបង្ការពន្លត់អគ្គិភ័យចំនួន០៣គ្រឿងនៃស្នងការដ្ឋាននគរបាលខេត្តកំពង់ស្ពឺបានចេញធ្វើអន្តរាគមន៍បាញ់ទឹកពន្លត់លើករណីនេះ។
ដោយឡែក លោក នៅ ម៉េត អាយុ៧០ឆ្នាំ ជាមេភូមិរើងពើង បាននិយាយឱ្យដឹងថា ផ្ទះប្រពលរដ្ឋចំនួន០៣ខ្នងដែលឆេះអស់នោះ ម្ចាស់ផ្ទះទី១-ឈ្មោះឈិន សារ៉ុម ភេទស្រី អាយុ៥៣ឆ្នាំ មុខរបរធ្វើការសំណង់ និងប្តីឈ្មោះ ញ៉ែម វ៉ាន់ អាយុ៥៥ឆ្នាំ ជាកម្មករសំណង់ រស់នៅភូមិរើងពើង ឃុំស្គុះ ស្រុកសំរោងទង (ផ្ទះតៀមទំហំ៦ម៉ែត្រគុណនឹង ៨ម៉ែត្រ ជញ្ជាំងស័ង្កសី), ម្ចាស់ផ្ទះទី២-ឈ្មោះ សុត សារ៉ាន់ ភេទស្រី អាយុ៤២ឆ្នាំ ជាកម្មកររោងចក្រ ប្តីឈ្មោះ ផានិត អាយុ៤៤ឆ្នាំ ជាជាងកាត់សក់ ផ្ទះទំហំ៥ម៉ែត្រគុណនឹង៦ម៉ែត្រ (តៀម), ទី៣-ឈ្មោះ រិត សុខ ភេទប្រុសអាយុ៦៤ឆ្នាំ មានប្រពន្ធឈ្មោះរិត មាន អាយុ៦១ឆ្នាំ ផ្ទះទំហំ៦ម៉ែត្រគុណនឹង៨ម៉ែត្រ ថ្មក្រោមឈើលើប្រក់ស័ង្កសី ។
លោកមេភូមិរើងពើងដដែលបានបញ្ជាក់ទៀតថា នៅមុនកើតហេតុ គឺឈ្មោះផានិត បានចេញទៅធ្វើការងារ ហើយ (ម្តាយឈ្មោះ រិត មាន)ដែលនៅផ្ទះជិតគ្នានោះ នៅមើលផ្ទះ ហើយពេលនោះស្រាប់តែទុស្សេខ្សែរភ្លើងជាមួយទូទឹកកកបណ្តាលឱ្យមានផ្សែងហុយក្លាយជាអណ្តាតភ្លើង ឆេះធ្វើឱ្យប្រជាពលរដ្ឋស្រែកឆោឡោឡើង ហើយលោកមេភូមិក៏បានរាយការណ៍ទៅលោកនាយប៉ុស្តិ៍នគរបាលឱ្យរាយការណ៍បន្តទៅលោកអធិការនគរបាលស្រុកហៅរថយន្តពន្លត់អគ្គិភ័យមកបាញ់ពន្លត់ ប៉ុន្តែផ្ទះឆេះអស់រលីងទៅហើយ៕អរុណរះ
