ភ្លើងហាក់ដូចជារលត់ទៅហើយ ប៉ុន្តែខ្លួនឯងចេះតែរំឮកឡើងវិញ ធ្វើឲ្យប្រជាពលរដ្ឋកាន់តែចាប់អារម្មណ៍ ។ ក្នុងនាមប្រជាពលរដ្ឋម្នាក់ ខ្ញុំបាទចាប់អារម្មណ៍ចំពោះការសុំទោសដដែលៗរបស់ព្រះតេជគុណ ឌូ វណ្ណឌឿន អតីតមេគណខេត្តកំពង់ស្ពឺ និងថា ជាកំហុសតិចតួច ដោយអចេតនា វាហាក់ដូចជាពុំត្រូវទាល់តែសោះ ។ តាមការយល់ឃើញរបស់ខ្ញុំបាទ អ្វីទៅជាកំហុសអចេតនា និងតិចតួចនោះ? ឡើងច្រៀង៥-៦បទ ប្រជាពុទ្ធបរិស័ទចំណុះជើងវត្តឡើងរាំវក់វី នេះឬកំហុសតិចតួច? ឬអចេតនានោះ ។
បើតាមខ្ញុំបាទ វាមិនមែនរឿងតូចតាច ឬអចេតនាអ្វីនោះឡើយ ។ ការដែលបានស្រែកបញ្ជាមិនឲ្យមានការថតរូបភាព គឺជាចេតនាមួយច្បាស់ណាស់ថា មិនមានបំណងឲ្យនរណាបានឃើញពីចំណុចខុសឆ្គងអវិជ្ជមាននេះទេ ។ វាមិនមែនជាអចេតនាទេ នៅពេលដែលស្រែកបញ្ជាមិនឲ្យគេថតនោះ ។ ច្បាស់ណាស់ថា វាជាចេតនាឡើងច្រៀង ដូច្នេះទើប ហាមគេថត ។ បើសិនវាជារឿងអចេតនា ក៏គ្មានសំឡេងស្រែកហាមនោះដែរ ។ ព្រះតេជគុណអាចគិតថា វាជារឿងតូចតាច ប៉ុន្តែការដែលចេញមុខមកលាងកំហុសដដែលៗនេះ មិនមែនជារឿងតូចតាចទេ ។ ផ្ទុយទៅវិញ វាជារឿងដែលខ្លួនឯងប្រាថ្នាស្រវាយកតំណែងមេគណខេត្តវិញ ប្រសិនបើរឿងនេះ ដូចដែលព្រះអង្គបានគិតថា ជារឿងតូចតាច និងជាកំហុសអចេតនា ។
វាជាការអនុគ្រោះពេកណាស់ទៅហើយ ដែលក្រសួងធម្មការ ក៏ដូចជាគណៈសង្ឃបានត្រឹមដកតំណែងព្រះមេគណខេត្តកំពង់ស្ពឺពីព្រះតេជគុណ ឌូ វណ្ណឌឿន ។ ប៉ុន្តែបើពិនិត្យអំពីស្ថានភាពជាក់ស្តែងនៃការឡើងច្រៀងនោះវិញ គឺថា ព្រះតេជគុណអង្គនេះ មានកំហុសធំ ដែលសមល្មមនឹងផ្សឹកបាន ។ ផ្ទុយទៅវិញ ព្រះតេជគុណអង្គនេះ នៅតែព្យាយាម បិទបាំងកំហុសរបស់ខ្លួន តាមរយៈការអះអាងថា វាជាកំហុសអចេតនា ។ វិភាគមើលទៅទិដ្ឋភាពទាំងនោះ វាពិតជាមិនមែនជាកំហុសដោយអចេតនាឡើយ ៕
ប្រជាពលរដ្ឋម្នាក់
