ភ្នំពេញ៖ ស្ត្រីវ័យចំណាស់២នាក់ និងនារីវ័យក្មេង២នាក់ រួមទាំងគ្រឿងញៀនតូចធំជិត១០០កញ្ចប់ត្រូវបានកម្លាំងការិយាល័យប្រឆាំងគ្រឿងញៀនក្រុងចេញប្រតិបត្តិការបង្ក្រាបទីតាំងលក់គ្រឿងញៀនម្លុំបឹងកក់ដែលស្ថិតនៅតាមផ្លូវរថភ្លើងព្រំទល់ខណ្ឌដូនពេញ និងខណ្ឌទួលគោក ហើយទីតាំងខាងលើជាទីតាំងជួញដូរ និងចែកចាយគ្រឿងញៀនដល់សកម្មផងដែរ។

ករណីចុះបង្ក្រាបទីតាំងជួញដូរគ្រឿងញៀនយ៉ាងសកម្មដូវផ្សារលក់ត្រីនេះធ្វើឡើងនៅវេលាម៉ោង១០ និង៣០នាទីព្រឹកថ្ងៃទី៣០ ខែមេសា ឆ្នាំ២០១៦ ស្ថិតនៅចំណុចផ្លូវរថភ្លើង ក្នុងសង្កាត់ស្រះចក និងសង្កាត់បឹងកក់២ ព្រំប្រទល់ខណ្ឌទួលគោក និងខណ្ឌដូនពេញ។

តាមប្រភពព័ត៌មានពីមន្ត្រីនគរបាលប្រឆាំងគ្រឿងញៀនក្រុងបានឲ្យដឹងថា ករណីបង្ក្រាបគ្រឿងញៀនខាងលើនេះគឺកម្លាំងបានតាមដានកំណត់មុខសញ្ញារហូតឈានទៅដល់ឃាត់ខ្លួនស្ត្រីវ័យចំណាស់២នាក់ នៅវេលាម៉ោង១០ និង៣០នាទីព្រឹកថ្ងៃខែដដែល នៅចំណុចផ្លូវរថភ្លើងសង្កាត់បឹងកក់២ ដកហូតបានជាង៣០កញ្ចប់តូច យកមកសាកសួរទើបឈានទៅដល់ការឃាត់ខ្លួនស្ត្រីវ័យក្មេង២នាក់ទៀតដែលនៅចំណុចផ្លូវរថភ្លើងដដែល ដោយជាលទ្ធផលដលហូតគ្រឿងញៀនតូចធំ៨៩កញ្ចប់ ក្នុងនោះ៣កញ្ចប់ធំ។

បច្ចុប្បជនសង្ស័យទាំង៤នាក់រួមទាំងគ្រឿងញៀនជាង១០០កញ្ចប់ត្រូវបានបញ្ជូនទៅការិយាល័យប្រឆាំងគ្រឿងញៀន ដើម្បីកសាងសំណុំរឿងចាត់ការតាមផ្លូវច្បាប់៕

ដោយ៖ ស ដារ៉ា