គណៈកម្មាធិការបណ្តឹងឧទ្ធរណ៍របស់ FIFA បានសម្រេចកាលពីថ្ងៃចន្ទ ទី៩ ឧសភាថា ការប្រកួតជម្រុះ World Cup រវាងប្រេស៊ីល និងអាហ្សង់ទីនត្រូវតែត្រូវលេងឡើងវិញ បន្ទាប់ពីបានពិចារណាលើបណ្តឹងឧទ្ធរណ៍ដែលប្តឹងដោយសមាគមបាល់ទាត់របស់ប្រទេសទាំង២។

ការប្រកួតជម្រុះក្នុងខែកញ្ញាត្រូវបានផ្អាកត្រឹមតែប៉ុន្មាននាទីបន្ទាប់ពីការចាប់ផ្តើមនៅពេលដែលមន្ត្រីសុខាភិបាលប្រេស៊ីលបានចូលមកទីលានដើម្បីបញ្ឈប់កីឡាកររបស់ប្រទេសអាហ្សង់ទីនពីការលេងដោយនិយាយថា ពួកគេបានបំពានច្បាប់នៃការដាក់ឱ្យនៅដាច់ដោយឡែកពីគេដោយសារពាក់ព័ន្ធជំងឺ COVID-19 របស់ប្រទេស។ក្រុមទាំងពីរបានឆ្លងផុតវគ្គជម្រុះ World Cup នៅប្រទេសកាតានៅចុងឆ្នាំនេះ ដោយក្រុមប្រេស៊ីលឈរលើកំពូលតារាងក្នុងតំបន់អាមេរិកខាងត្បូង និងអាហ្សង់ទីនបញ្ចប់ក្នុងចំណាត់ថ្នាក់លេខពីរ ប៉ុន្តែ​ស្ថាប័ន​គ្រប់គ្រង​បាល់ទាត់​របស់ FIFA បាន​សម្រេច​កាលពី​ខែ​កុម្ភៈ​ថា ​ការ​ប្រកួត​ត្រូវ​តែ​លេង​ឡើងវិញ។FIFA បានប្រកាសនៅក្នុងសេចក្តីថ្លែងការណ៍មួយថា “បន្ទាប់ពីការវិភាគលើការដាក់ស្នើរបស់ភាគីទាំងពីរ និងពិចារណាគ្រប់កាលៈទេសៈនៃករណីនេះ គណៈកម្មាធិការសាលាឧទ្ធរណ៍បានបញ្ជាក់ថា ការប្រកួតនឹងត្រូវលេងឡើងវិញ។ ជាមួយគ្នានេះក៏បានតម្កល់ការផាកពិន័យចំនួន៥០,០០០ហ្វ្រង់ស្វីស (៥០,៣២២ដុល្លារអាមេរិក) ដែលត្រូវបានដាក់លើសមាគមទាំងពីរជាលទ្ធផលនៃការបោះបង់ចោលការប្រកួត” ។FIFA ក៏បានពិន័យ FA របស់ប្រេស៊ីល (CBF) និងសមាគមបាល់ទាត់អាហ្សង់ទីន (AFA) ចំនួន ៥០០,០០០ហ្វ្រង់ស្វីស និង២០០,០០០ហ្វ្រង់ស្វីសរៀងៗខ្លួនចំពោះការខកខានរបស់ពួកគេក្នុងការធានាសណ្តាប់ធ្នាប់ និងសុវត្ថិភាព។ទោះជាយ៉ាងណាក៏ដោយ គណៈកម្មាធិការសាលាឧទ្ធរណ៍បាននិយាយថា ខ្លួនបានសម្រេចចិត្តកាត់បន្ថយការផាកពិន័យលើ CBF ចំនួន២៥០,០០០ហ្វ្រង់ស្វីស ខណៈដែលការផាកពិន័យលើ AFA ត្រូវបានកាត់បន្ថយចំនួន១០០,០០០ហ្វ្រង់ស្វីស។ កាល​ពី​ខែ​មុន AFA បាន​ប្រកាស​ថា ពួក​គេ​នឹង​ប្តឹង​ឧទ្ធរណ៍​ទៅ​តុលាការ​អាជ្ញាកណ្តាល​សម្រាប់​កីឡា។

ប្រេស៊ីល និងអាហ្សង់ទីនក៏នឹងត្រូវជួបគ្នាក្នុងការប្រកួតមិត្តភាពអន្តរជាតិនៅ Melbourne Cricket Ground ក្នុងប្រទេសអូស្ត្រាលីក្នុងខែមិថុនាខាងមុខនេះផងដែរ ៕​ (រូបភាព ៖​ Reuters)