ភ្នំពេញ៖ ជនសង្ស័យម្នាក់ក្នុងចំណោមបក្ខពួកពីរនាក់ត្រូវបានសមត្ថកិច្ចឃាត់ខ្លួនព្រោះជាប់ពាក់ព័ន្ធករណីលួចម៉ូតូ។
ហេតុការណ៍នេះបានកេីតឡេីងកាលពីវេលាម៉ោង២២និង៣០នាទី ថ្ងៃទី២៥ ខែ ឧសភា ឆ្នាំ២០២២ នៅចំណុចភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ ឌី សារ៉ាក ភេទប្រុស អាយុ១៧ឆ្នាំ មុខរបរនិងទីលំនៅមិនពិតប្រាកដ។
ចំណែកជនរងគ្រោះឈ្មោះសៀម សៀវម៉ី ភេទស្រី អាយុ២៣ឆ្នាំ ស្នាក់នៅភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ។
សម្ភារះដកហូតបានមានម៉ូតូ០១គ្រឿងម៉ាកនិច ពណ៌ក្រហមលាយខ្មៅ ពាក់ស្លាកលេខភ្នំពេញ 1DP-0035 ។
តាមរបាយការណ៍របស់សមត្ថកិច្ចបានឱ្យដឹងថា មុនពេលកេីតហេតុជនរងគ្រោះកំពុងដឹកអីវ៉ាន់ឱ្យភ្ញៀវ ពេលនោះមានប្អូនប្រុសជនរងគ្រោះបានខលមកប្រាប់ថា មានគេលួចម៉ូតូបាត់ហេីយ។ ភ្លាមនោះជនរងគ្រោះក៏ជិះម៉ូតូជាមួយមិត្តភក្តិដេីររកនៅម្តុំមុខព្រលានយន្តហោះអន្តរជាតិភ្នំពេញ ស្រាប់តែឃេីញជនសង្ស័យចំនួន២នាក់កំពុងជិះម៉ូតូរបស់ខ្លួនក៏ស្រែកថាចោរៗ ហើយជិះតាមពីក្រោយរហូតទៅដល់បុរីសន្តិភាព២ សង្កាត់ចោមចៅទី២ ទេីបជនសង្ស័យដួលម៉ូតូក៏ត្រូវប្រជាពលរដ្ឋដេញឃាត់បានម្នាក់ប្រគល់ជូនសមត្ថកិច្ចតែម្តង។
បច្ចុប្បន្នជនសង្ស័យត្រូវបានកម្លាំងប៉ុស្តិ៍មូលដ្ឋាននគរបាលកាកាបទី១កសាងសំណុំរឿងបញ្ជូនទៅផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យដើម្បីចាត់ការតាមនីតិវិធី៕
ដោយ៖សុខាសែនជ័យ
