ខេត្តព្រះសីហនុ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅយប់ថ្ងៃពុធ ១រោច ខែជេស្ឋ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៥ ខែមិថុនា ឆ្នាំ២០២២ បានដឹងនាំកម្លាំងការិយាល័យគ្រប់គ្រងអាវុធគ្រឿងផ្ទុះ និងជាតិពុល សហការណ៍ជាមួយកម្លាំងនគរបាលព្រហ្មទណ្ឌ កម្លាំងនគរបាលចរាចរណ៍ផ្លូវគោក កម្លាំងនគរបាលការពារអន្តរាគមន៍ បានធ្វេីការចុះឆែកឆេរអាវុធគ្រឿងផ្ទុះ និងបទល្មើសផ្សេងៗ នៅតាមទីតាំងសំខាន់ៗនៅក្នុងក្រុងព្រះសីហនុ។
សូមជម្រាបដែរថា កាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃទី១៥ ខែមិថុនា ឆ្នាំ២០២២ មានករណីផ្ទុះអាវុធជាច្រើនគ្រាប់ បានបង្កឱ្យមានភាពភ្ញាក់ផ្អើលទកណ្ដាលក្រុងព្រះសីហនុ បន្ទាប់ពីជនជាតិចិន១ក្រុម បានធ្វេីសកម្មភាពបាញ់ប្រមាណ៩គ្រាប់ នៅចំណុចផ្លូវអន្ទង់អាំងក្បែរសណ្ឋាគារស៊ីហួ ស្ថិតក្នុងឃុំ១ សង្កាត់លេខ៣ ក្រុងព្រះសីហនុ បណ្ដាលឱ្យមនុស្សម្នាក់បានរងរបួសបាក់ភ្លៅខាងស្ដាំ ត្រូវបាននាំទៅសង្គ្រោះបន្ទាន់នៅមន្ទីរពេទ្យយីហោ”ថៃខាង”។
បច្ចុប្បន្ន សមត្ថកិច្ចកំពុងបន្តស្រាវជ្រាវស៊ើបអង្កេតតាមចាប់ខ្លួនជនបង្ក យកមកផ្ដន្ទាទោសទៅតាមផ្លូវច្បាប់ផងដែរ៕
ដោយ៖ស តារា
