ភ្នំពេញ ៖ បុរសម្នាក់បើកម៉ូតូ ឌុបនារីម្នាក់ទៀតពីក្រោយ ចេញពីក្លឹបកម្សានមួយកន្លែង ជិះម៉ូតូបត់ឆ្លងផ្លូវមិនប្រយ័ត្ន ក៏ត្រូវរថយន្តដឹកទំនិញធុនធំបើកលឿនជ្រុលទៅបុកចំពីមុខយ៉ាងពេញទំហឹង បណ្តាលឲ្យដួលម៉ូតូរួចកិនពីលើស្លាប់ទាំង២នាក់ នៅនឹងកន្លែងកើតហេតុ ចំណែករថយន្តបង្កបន្តបើករត់ទៅមុខ តែត្រូវបានប្រជាពលរដ្ឋដេញពីក្រោយ តាមឃាត់បានទាំងរថយន្តនឹងអ្នកបើកបរ។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅម៉ោង ៤និង៣០នាទីព្រលឹមថ្ងៃទី១៧ ខែមិថុនា ឆ្នាំ២០២២ ស្ថិតនៅតាមបណ្ដោយផ្លូវសហព័ន្ធរុស្ស៊ី ខាងមុខព្រលានយន្តហោះអន្តរជាតិភ្នំពេញ ក្នុងសង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថាសពជនរងគ្រោះ ទី១ មានឈ្មោះ ហៅខ្មៅភេទប្រុស អាយុជាង២០ ឆ្នាំមានស្រុកកំណើតរស់នៅខេត្តព្រៃវែង។ សពទី២ មានឈ្មោះ អាមី ភេទស្រី អាយុជាង២០ឆ្នាំមុខ របរ ជាអ្នកលក់ស្រាក្រឡុក មានស្រុកកណើតនៅខេត្តកំពង់ចាម។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុគាត់បានឃើញបុរសម្នាក់ បើកម៉ូតម៉ាកហុងដាឌ្រីមសង់សេ១២៥ ពណ៌ខ្មៅពាក់ស្លាកលេខ ភ្នំពេញ1FL-6766 ជិះឌុបនារីម្នាក់ទៀតពីក្រោយ តាមបណ្តោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច ខណៈមកដល់ចំណុចកើតហេតុ បានបត់ឆ្វេងឆ្លងចូលទៅផ្លូវម្ខាងទៀត ពេលបត់ដល់ពាក់កណ្តាលផ្លូវ ស្រាប់តែត្រូវរថយន្តដឹកទំនិញធុនធំមួយគ្រឿង ពណ៌សពាក់ស្លាកលេខភ្នំពេញ3C-7817 បើកបរដោយបុរសម្នាក់រួមដំណើរជាមួយនិងស្រ្តីម្នាក់ទៀត ត្រូវជាប្រពន្ធ បើកតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចមកកើតយ៉ាងលឿន ជាន់ហ្រ្វាំងមិនទាន់ ក៏ជ្រុលទៅបុកម៉ូតូឌ្រីមសង់ចំពីមុខពេញទំហឹងបណ្តាលឲ្យដួលម៉ូតូ រួចកិនពីលើជនរងគ្រោះស្លាប់ទាំង២នាក់ នៅនិងកន្លែងកើតហេតុ ក្រោយកើតហេតុរថយន្តបង្កមិនបានឈប់ដោះស្រាយនោះទេ ព្យាយាមបើករត់ទៅមុខរហូតមកដល់ផ្លូវបេតុង ក្នុងសង្កាត់ក្រាំងធ្នង់ ខណ្ឌសែនសុខ ទើបប្រជាពលរដ្ឋឃាត់បានរថយន្តនឹងអ្នកបើកបរប្រគល់ឲ្យសមត្ថកិច្ច។
បន្ទាប់ពីកើតហេតុសមត្ថកិច្ចមូលដ្ឋាន សហការជាមួយនិងសមត្ថកិច្ចជំនាញចរាចរណ៍ ឲ្យចុះមកវាស់វែងស្ទូចយករថយន្តនឹងម៉ូតូជនរងគ្រោះ ទៅរក្សាទុកនៅខាងការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយនៅពេលក្រោយ ចំណែកសពជនរងគ្រោះទាំងពីរសមត្ថកិច្ចធ្វើកំណត់ហេតុរួចដើម្បីស្វែងរកក្រុមគ្រួសារមកទទួលយកទៅធ្វើបុណ្យតាមប្រពៃណី៕

ដោយ៖ជ្រោយពេជ្រ