ភ្នំពេញ៖ នាវីវ័យក្មេងម្នាក់បានបើករថយន្ត១គ្រឿងមា៉កហាយឡែនបានរេចង្កូតទៅ ជ្រុលទៅបុកចូលឃ្លាំងលក់រថយន្ត យីហោ V-99 បណ្តាលឲ្យខូចទ្វារឃ្លាំងមួយផ្ទាំង និងខូចផ្នែកខាងមុខរថយន្ត Porsche មួយគ្រឿង។
ហេតុការណ៍នេះកើតឡើងកាលពីវេលាម៉ោង៧ និង៣០នាទីយប់ថ្ងៃទី៧ ខែឧសភា ឆ្នាំ២០១៦ ស្ថិតនៅតាមបណ្តោយផ្លូវសហព័ន្ធរុស្សីុ ជាប់ផ្សារបាយ័ន សង្កាត់មនោរម្យ ខណ្ឌ៧មករា រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញនារី២នាក់បើករថយន្ត១គ្រឿងមា៉កហាយឡែនឌ័រ ពណ៌ស្ករ ពាក់ស្លាកលេខ 2S-2278 ធ្វើដំណើរតាមផ្លូវសហព័ន្ធរុស្សីុ ក្នុងទិដៅពីលិចទៅកើត ស្រាប់តែដល់មុខចំណុចកើតហេតុខាងលើ ក៏រេចង្កូតជ្រុលទៅបុកចូលឃ្លាំងលក់រថយន្ត យីហោ V-99 តែម្តង ។
ក្រោយកើតហេតុរថយន្តទាំង២គ្រឿងត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌ៧មករាដើម្បីដោះស្រាយគ្នានៅពេលក្រោយ ៕
ដោយ៖ ស រស្មី
