ភ្នំពេញ៖ បុរសម្នាក់ទំនងជាស្រវឹងស្រាបានបើករថយន្តម៉ាកសូណាក្នុងល្បឿនលឿន បានជ្រុលចង្កូតទៅបុករនាំងដែកពុះចែកទ្រូងផ្លូវបណ្ដាលឲ្យបាក់អស់ចំនួន៤ផ្ទាំងរងការខូចខាត តែសំណាងល្អមិនបង្កគ្រោះថ្នាក់ដល់អ្នកដំណើរតាមដងផ្លូវនោះទេ ក្រោយមករថយន្តបង្កបានព្យាយាមបើករត់តែត្រូវសមត្ថកិច្ចឃាត់បាន ។
ហេតុការណ៍នេះបានកើតឡើងកាលពីវេលាម៉ោង៣នឹង២០នាទីរំលងអាធ្រាត ឈានចូលថ្ងៃទី១០ ខែឧសភា ឆ្នាំ២០១៦ នៅចំណុចមុខផ្សារឡាក់គី តាមបណ្តោយផ្លូវព្រះសីហនុ ស្ថិតក្នុងសង្កាត់បឹងកេងកងទី១ ខណ្ឌចំការមន ។
យោងតាមប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់ទំនងជាស្រវឹងស្រាបានបើករថយន្តម៉ាកសូណាតា ពណ៍ទឹកប្រាក់ ពាក់ស្លាកលេខ ភ្នំពេញ 2AG-9240 បើកបរតាមបណ្តោយផ្លូវព្រះសីហនុ ទិសដៅពីលិចទៅកើតក្នុងល្បឿនលឿន ពេលមកដល់ចំណុចកើតហេតុបានរេចង្កូតបុករះរនាំងដែកពុះចែកទ្រូងផ្លូវបាក់អស់៤កង់ ហើយបានព្យាយាមបើករត់ទាំងរថយន្តបានដាច់កាឡេកង់មុខខាងឆ្វេងត្រូវបានប្រជាពលរដ្ឋដែលឃើញហេតុការណ៍នោះដេញតាមនិងរាយការណ៍ទៅសមត្ថកិច្ចឲ្យចុះមកឃាត់រថយន្តបង្កនោះតែម្ដង ។
ក្រោយមកសមត្ថកិច្ចមូលដ្ឋានបានបានរាយការណ៍ទៅជំនាញឲ្យចុះមកធ្វើការវាស់វែង និងយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕
ដោយ៖ ជីម ភារ៉ា ដង្កោ
