ខេត្តឧត្ដរមានជ័យ៖ បន្ទាប់ពីវិរុសបំប្លែងខ្លួនថ្មី AB4/AB5 កំពុងរាលដាលឆ្លងខ្លាំងម្ដងទៀត នៅប្រទេសថៃនោះ មន្រ្តីជំនាញសុខាភិបាលរួមទាំងកងកម្លាំងឈរជើងជួរមុខទាំងអស់ នៅតែបន្តបង្កើនពង្រឹងវិធានការត្រួតពិនិត្យលើអ្នកដំណើរឆ្លងដែនគ្រប់រូបនៅតាមច្រកទ្វារព្រំដែនសំខាន់ៗ ក្នុងភូមិសាស្រ្តខេត្តឧត្តរមានជ័យ។ នេះបេីយោងតាមការបញ្ជាក់ពីលោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ។
លោកវេជ្ជបណ្ឌិត ឃ្លោក ហួត បានឱ្យដឹងទៀតថា ក្រុមការងារមន្រ្តីសុខាភិបាលជួរមុខ បច្ចុប្បន្ននៅតែពង្រឹងវិធានការការពារនិងត្រួតពិនិត្យយ៉ាងម៉ត់ចត់គ្រប់ពេលនៅតាមច្រកព្រំដែនដែលខ្លួនបានឈរជើងដើម្បីរឹតបន្តឹងលើការពិនិត្យសុខភាពរបស់បងប្អូនអ្នកដំណើរឆ្លងដែនគ្រប់រូប ដោយមិនមានការធ្វេសប្រហែសនោះឡើយ ខណៈករណីវីរុសបំប្លែងថ្មីបានរាលដាលសារជាថ្មីម្តងទៀតនៅឯប្រទេសថៃនោះ។
លោកប្រធានមន្ទីរសុខាភិបាលខេត្តរូបនេះ បានបញ្ជាក់បន្ថែមថា ពាក់ព័ន្ធករណីទាំងអស់នេះសម្រាប់សមត្ថកិច្ចជំនាញដែលឈរជើងតាមច្រកព្រំដែនទាំងភាគីកម្ពុជា-ថៃ បានសហការណ៍គ្នាបានយ៉ាងប្រសើរក្នុងការត្រួតពិនិត្យទៅលើករណីនេះ ដោយការប្រុងប្រយ័ត្នខ្ពស់ ចំពោះពលរដ្ឋអ្នកដំណើរឆ្លងដែនទាំងសងខាងដោយការពិនិត្យលើប័ណ្ណចាក់វ៉ាក់សាំងចាប់ដូសទី២ឡើង ទើបអាចឆ្លងដែនបាន។ ចំណែកអ្នកដែលពុំទាន់បានចាក់វ៉ាក់សាំង ក្រុមការងារមន្រ្តីសុខាភិបាលជួរមុខ បានផ្តល់ការចាក់វ៉ាក់ជូនបងប្អូននៅនឹងច្រកព្រំដែនតែម្តង ដើម្បីបង្ការជំងឺឆ្លងផងដែរ។
សូមជម្រាបថា កាលពីរសៀលថ្ងៃសុក្រទី២២ ខែកក្កដា ឆ្នាំ២០២២ម្សិលមិញនេះ លោក ជា ពិសិដ្ឋ នាយករដ្ឋបាលសាលាខេត្ត ដោយបានការឯកភាពពីសំណាក់ លោក ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ ដឹកនាំក្រុមការងារចូលរួមកិច្ចប្រជុំជំរុញអនុវត្តសកម្មភាពចាក់វ៉ាក់សាំងកូវីដ-១៩ ប្រកបដោយបរិយាបន្ននៅរដ្ឋបាលថ្នាក់ក្រោមជាតិ ដើម្បីពង្រឹង និងជំរុញការអនុវត្តសកម្មភាពនេះឱ្យបានទាន់ពេលវេលាក្នុងខែកញ្ញា ឆ្នាំ២០២២ ព្រមទាំងធានាការអនុវត្តន៍ថវិកាដែលបានផ្ទេស្របតាមនិតិវិធីកំណត់ ក្រោមការរៀបចំឬបស់ ក្រុមកាងារគ្រប់គ្រងគម្រោងលើកកម្ពស់វិស័យសេវាសង្គមនៃអគ្គនាយកដ្ឋានរដ្ឋបាល តាមរយៈប្រព័ន្ធវីដេអូពីចម្ងាយZOOM៕
ដោយ៖សហការី
