ខេត្តស្វាយរៀង៖ ប្រជាពលរដ្ឋដែលមានទីលំនៅក្នុងសង្កាត់គយត្របែកក្រុងស្វាយរៀងមានការសប្បាយរីករាយនិងរំភើបយ៉ាងខ្លាំងដោយលែងមានការខ្វាយខ្វល់ចំពោះសុខភាពរបស់គាត់ខណៈដែលអាជ្ញាធរខេត្តបានឆ្លើយតបនិងសំណូមពររបស់ប្រជាពលរដ្ឋ ដែលបានលើកឡើងនៅក្នុងវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋានក្រុងស្វាយរៀង កាលពីកន្លងមកដោយបានភ្ជាប់បណ្ដាញទឹកស្អាតជូនដល់ពួកគាត់ប្រើប្រាស់ផងដែរ។

លោក វណ្ណាក់ អាយុ៣៩ឆ្នាំ មុខរបរលក់ដូរ មានទីលំនៅក្នុងសង្កាត់គយត្របែក ក្រុងស្វាយរៀង បានឲ្យដឹងនៅព្រឹកថ្ងៃទី១០ ខែឧសភា ឆ្នាំ២០១៦នេះថា រូបគាត់និងប្រជាពលរដ្ឋមានការសប្បាយចិត្តដោយបានប្រើប្រាស់បណ្ដាញទឹកស្អាតរបស់រដ្ឋខណៈដែលពីមុនមិនមានទឺកស្អាតទេគឺមានតែទឹកអណ្ដូងនិងទឹកស្រះប្រើប្រាស់ជាប្រចាំក្នុងជីវភាពរស់នៅ។

លោក វណ្ណាក់ បន្តទៀតថា ប៉ុន្តែដោយមានការធ្វើវេទិការសាធារណៈរបស់ក្រុមការងារថ្នាក់ជាតិចុះមូលដ្ឋានក៏ដូចជាអាជ្ញាធរខេត្តនាពេលកន្លមកដោយប្រជាពលរដ្ឋបានសំណូមពរឲ្យភ្ជាប់បណ្ដាញទឹកស្អាតជូនដល់ពួកគាត់សម្រាប់ប្រើប្រាស់នោះគឺទទួលបានការឆ្លើយតបដូចបំណងដោយនៅព្រឹកថ្ងៃទី១០ខែឧសភាឆ្នាំ២០១៦ដោយអាជ្ញាធរខេត្ត បានភ្ជាប់បណ្ដាញទឹកស្អាតជូនដល់ពួកគាត់សម្រាប់ប្រើប្រាស់ក្នុងជីវភាពរស់នៅដោយឈប់ខ្វល់ពីបញ្ហាសុខភាពទឹកមិនស្អាតទៀតហើយ។

ប្រជាពលរដ្ឋក្នុងសង្កាត់គយត្របែកក្រុងស្វាយរៀង សូមថ្លែងអំណរគុណចំពោះអាជ្ញាធរខេត្តក៏ដូចជាក្រុមការងារថ្នាក់ជាតិចុះមូលដ្ឋានដែលបានគិតគូរពីសុខទុក្ខរបស់ប្រជាពលរដ្ឋ ពិសេសប្រមុខថ្នាក់ដឹកនាំរាជរដ្ឋភិបាលដែលមានសម្ដេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជាផងដែរ។