ភ្នំពេញ៖ បើទោះបីស្ថិត ក្នុងវិបត្តិជំងឺកូវីដ19 ក៏ដោយក៏ការនាំចេញទំនិញរបស់កម្ពុជាទៅកាន់ទីផ្សារអន្តរជាតិនៅតែមានការកើនឡើងគួរឲ្យកត់សម្គាល់។ ក្នុងនោះផលិតផលកាត់ដេរនិងផលិតផលមិនមែនកាត់ដេរបានដើរតួនាទីយ៉ាងសំខាន់ក្នុងការជំរុញអោយសេដ្ឋកិច្ចប្រទេសមានភាពប្រសើរឡើង។
ជាក់ស្ដែងក្នុងរយៈពេល៦ខែនៃឆ្នាំ 2022 នេះ កម្ពុជាបាននាំចេញផលិតផលកាត់ដេរ និងផលិតផលមិនមែនកាត់ដេរ មានកំណើនខ្ពស់ គួរឱ្យកត់សម្គាល់ពេលដែលការនាំចេញផលិតផលកសិកម្មមានកំណើនទាប។ ប្រសិនបើមិនមានឧបសគ្គផ្សេងៗដូចជាវិបត្តិសង្គ្រាមនៅអ៊ុយក្រែនទេនោះ គេរំពឹងថាចរន្តនៃការនាំចេញផលិតផលកាត់ដេរនិងផលិតផលមិនមែនកាត់ដេរមានការកើនឡើងជាងការរំពឹងទុក។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករ កម្ពុជា ការនាំចេញទំនិញក្នុងទំហំទឹកប្រាក់ជាង ១១ពាន់លានដុល្លារ ក្នុងឆមាសទី១ ឆ្នាំ២០២២ ដោយក្នុងនោះ ការនាំចេញផលិតកាត់ដេរកើន ៣៩ភាគរយ និងផលិតផលមិនមែនកាត់ដេរកើន ៤០ភាគរយ ។ ឧបសគ្គនៃវិបត្តិសង្គ្រាមនៅអ៊ុយក្រែននាំឲ្យតម្លៃនៃការដឹកជញ្ជូនមានការកើនឡើង។
របាយការណ៍ដដែល បញ្ជាក់ថា ការនាំចេញកសិផលកើនត្រឹមតែ ១០,២ភាគរយ បើធៀបរយះពេលដូចគ្នាក្នុងឆ្នាំ ២០២១។ ដូច្នេះមានន័យថា ការនាំចេញផលិតផលកាត់ដេរនិងផលិតផលមិនមែនកាត់ដេរនៅតែនាំមុខគេ។
ការនាំចេញផលិតផលកាត់ដេរដូចជា ស្បែកជើង កាបូប សំលៀកបំពាក់ជាដើម មានទំហំទឹកប្រាក់ ៦,៥៦ពាន់លានដុល្លារ កើនឡើង ៣៩ភាគរយ ។
ចំណែកការនាំចេញផលិតផលមិនមែនកាត់ដេរដូចជា គ្រឿងបំណែកអេឡិចត្រូនិក កង់ ផលិតផលពីឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត មានទំហំទឹកប្រាក់ ២,៦៥ពាន់លានដុល្លារ ក្នុងឆមាសទី១នេះ ។
ចំណែកឯការនាំចេញផលិតផលកសិផលមានតម្លៃ ១,៧៤ ពាន់លានដុល្លារក្នុងឆមាសទី១ ដែលកើនឡើង ១០,២ភាគរយធៀបគ្រាដូចគ្នាក្នុងឆ្នាំ២០២១។
សូមបញ្ជាក់ កម្ពុជាមានទំហំពាណិជ្ជកម្ម ២៧,២៤ពាន់លានដុល្លារអាមេរិក ក្នុងឆមាសទី១ ឆ្នាំ២០២២នេះ។ ក្នុងនោះ ការនាំចេញរបស់កម្ពុជា គឺមានតម្លៃ ១១,៣៧ពាន់លានដុល្លារ ខណៈការនាំចូលមានតម្លៃ ១៥,៨៦ពាន់លានដុល្លារ៕
