ខេត្តសៀមរាប : លោកស្រី សាត ធីតា ព្រះរាជអាជ្ញារង និងជាអ្នកនាំពាក្យសាលាដំបូងខេត្តសៀមរាបបានប្រាប់សារព័ត៌មាន នៅថ្ងៃទី៦ ខែសីហានេះថា ឈ្មោះ សោម សមស័ក្តិ ត្រូវបានតំណាងអយ្យការ សម្រេចចោទប្រកាន់ពីបទ “ជេរប្រមាថ ហិង្សាដោយចេតនា និងប៉ុនប៉ងមនុស្សឃាត”។ បច្ចុប្បន្នសំណុំរឿងលោក សោម សមស័ក្តិ កំពុងស្ថិត  ក្នុងការអនុវត្តនីតិវិធីរបស់ចៅក្រមស៊ើបសួរ។

សូមបញ្ជាក់ថា,  នៅទីបំផុត ! តំណាងអយ្យការអមសាលាដំបូងខេត្តសៀមរាប បានសម្រេចចោទប្រកាន់លោក សោម សមស័ក្តិ នាយកទីចាត់ការហិរញ្ញវត្ថុខេត្តសៀមរាប ចំនួន៣បទល្មើស ពាក់ព័ន្ធករណីហឹង្សាដោយចេតនា និងបទប៉ុនប៉ងមនុស្សឃាតលើស្ត្រីម្នាក់ នឹងបានបញ្ជូនសំណុំរឿង ទៅចៅក្រមស៊ើបសួរដើម្បីចាត់ការបន្តតាមនីតិវិធី។ ការសម្រេចចោទប្រកាន់ បានធ្វើឡើងបន្ទាប់ពីលោក សោម សមស័ក្តិ មិនបានចូលខ្លួនឆ្លើយបំភ្លឺចំនួនពីរដោយបានពន្យាពេល។ ប៉ុន្តែទោះបីជាយ៉ាងណាក៏ដោយតុលាការនៅតែបន្តនីតិវិធីរបស់ខ្លួន។

 ទាក់ទងករណីនេះ ស្ត្រីរងគ្រោះឈ្មោះ ផាត់ សុជឿន បានដាក់ពាក្យបណ្តឹងប្តឹងលោក សោម សមស័ក្តិ នាយកទីចាត់ការហិរញ្ញវត្ថុខេត្តសៀមរាប ទៅសាលាដំបូងខេត្តសៀមរាប ពីបទជេរប្រមាថជាសាធារណ: បទប្រើអំពើហិង្សាដោយចេតនា និងបទប៉ុនប៉ងមនុស្សឃាត តាមរយៈបើករថយន្តម៉ាក range rover discovery ពាក់ស្លាកលេខភ្នំពេញ 2BU-០០០៩ ប៉ុនប៉ងបំបុក នៅចំណុចផ្សារ អាស៊ី កាលពីយប់ថ្ងៃទី១៤ ខែមិថុនា ឆ្នាំ២០២២។ បន្ទាប់ពីទទួលបានពាក្យបណ្តឹងតំណាងអយ្យការអមសាលាដំបូងខេត្តសៀមរាប បានចេញដីកាកោះហៅលោក សោម សមស័ក្តិ ឲ្យចូលខ្លួនទៅបំភ្លឺនៅតុលាការចំនួន២ដងរួចមកហើយ តែលោកសោម សមស័ក្តិ មិនបានចូលទៅតាមដីកាទេ ដោយដាក់ពាក្យសុំពន្យា ។

ស្ត្រីរងគ្រោះបានអះអាងថា នៅមុនពេលកើតហេតុពួកគាត់មានគ្នា៨ទៅ៩ នាក់ញាំអាហារនៅផ្សារទំនើប អាស៊ី ត្រង់ចំណុចក្រោយព្រះអង្គចេកព្រះអង្គចម ស្ថិតនៅភូមិមណ្ឌល១ សង្កាត់ស្វាយដង្គុំ ក្រុង/ខេត្តសៀមរាប។ លុះពេលចេញមក ដល់ខាងមុខ វេលាម៉ោង ១០និង៣០នាទីយប់ ថ្ងៃទី១៤ ខែមិថុនា ឆ្នាំ ២០២២ ឈ្មោះ ស័ក្ត ដែលជាជនដៃដល់បានវាយសង្កត់ក្បាលលោកម៉ក់ ប្រុស អភិបាលស្រុកសូទ្រនិគម ដែលរួមដំណើរជាមួយគាត់(ស្ត្រីរងគ្រោះ)ជាច្រើនដង។ ខណ:នោះរូបគាត់(ជនរងគ្រោះ)បាននិយាយថា ម៉េចក៏វាយក្បាលគាត់ចឹង គាត់ចាស់ជាង វាយរបៀបហ្នឹងមិនសមទេ។ ភ្លាមនោះជនដៃដល់បានជេរប្រមាថទៅលើរូបគាត់ ហើយវាយមកលើផ្ទៃមុខផ្នែកក្បាលរបស់គាត់១ដៃនិងបន្តជេរប្រមាថរហូតផ្អើលដល់សមត្ថកិច្ចមកជួយអន្តរាគមន៍។

ស្ត្រីរងគ្រោះបន្តថា ពេលក្រុមសមត្ថកិច្ចមកដល់កន្លែងកើតហេតុ ជនដៃដល់បានបើករថយន្តម៉ាក range rover discovery ពាក់ស្លាកលេខភ្នំពេញ 2BU-០០០៩ ចេញមួយសន្ទុះ ហើយបើកត្រឡប់មកបំបុករូបគាត់ បំណងសម្លាប់។ ប៉ុន្តែសំណាង ដោយសាម៉ូតូរបស់ប៉ូលិសនៅបាំងពីមុខ ទើបបុកត្រូវម៉ូតូរបស់ប៉ូលិស​ បណ្តាលអោយដួលខ្ទេច ហើយដួលសង្កត់ជើងរបស់គាត់បណ្តាលអោយរងរបួសស្រាល ទើបជនបង្កបើករថយន្តគេចខ្លួនតែម្តង។

ស្ត្រីរងគ្រោះ បញ្ជាក់ថា រវាងរូបគាត់ និងជនបង្កពុំដែលស្គាល់គ្នាសោះឡើយ ប៉ុន្តែជនរូបនេះ បែរជាមកប៉ុនប៉ងធ្វើឃាតលើរូបគាត់ទៅវិញ អីចឹងហើយទើបសម្រេចដាក់ពាក្យបណ្តឹង ដើម្បីស្វែងរក យុត្តិធម៌​។ចំណែកពាក្យបណ្តឹងដែលប្តឹងនៅដំណាក់កាលប៉ូលិស រូបគាត់មិនទាន់ទាមទារសំណងទេ គឺសុំអោយតែអនុវត្តទៅតាមច្បាប់។​​

ដោយឡែកករណីនេះ លោក យិន ស្រាង ប្រធានលេខាធិការដ្ឋានរដ្ឋបាលសាលាដំបូងខេត្តសៀមរាប មិនអាចសុំការអត្ថាធិប្បាយបញ្ជាក់បន្ថែមលើករណីនេះបានទេ ដោយអ្នកសារព័ត៌មាន ទូរស័ព្ទចូលជាច្រើនដងមិនមានអ្នកទទួល ជាជាប់ធុរ:ការងារមមាញឹក។​

ចំណែកលោក សោម សមស័ក្តិ នាយកទីចាត់ការហិរញ្ញវត្ថុសាលាខេត្តសៀមរាប ក៏មិនអាចសុំការបកស្រាយបានដែរ ព្រោះគ្មានលេខទូរស័ព្ទ ៕

ដោយ : សិលា