ខេត្តរតនគិរី៖ នៅគ្រាដែលជំនួនទឹកភ្លៀងបានកំពុងកើតឡើងនៅបណ្តាខេត្តភាគឦសាន គណៈកម្មាធិការជាតិគ្រប់គ្រងគ្រោះមហន្តរាយបានអះអាងថា ខ្លួនបានត្រៀមបម្រុងសម្រាប់ការសង្គ្រោះបន្ទាន់រួចរាល់ហើយប្រសិនបើមានបញ្ហាជាយថាហេតុកើតឡើង។
ក្នុងករណីនេះនៅឯខេត្តរតនគិរី ទូកដមួយគ្រឿង បានលិចនៅទន្លេ ស្រែពក ក្នុងទឹកដីខេត្តរតនគិរី នៅព្រឹកថ្ងៃ ទី១០ ខែសីហានេះ បណ្ដាលឱ្យបាត់ខ្លួនមនុស្សម្នាក់ ខណៈ១១នាក់ផ្សេង ទៀត ត្រូវបានជួយសង្គ្រោះបានទាន់ពេលវេលា។
មន្ត្រីនគរបាល បានឱ្យដឹងថា ឧបទ្ទវហេតុនេះ បានកើតឡើងនៅចំណុចកំពង់ចម្លងភូមិ០៥ ឃុំត្រពាំង ច្រេស ស្រុកកូនមុំ ។ ទូក បានលិច ដោយសារផ្ទុកលើសចំណុះ គឺមនុស្សរហូតដល់១២នាក់ និងម៉ូតូ ៤គ្រឿង ហើយបើកបរចំកន្លែងទឹកហូរកួចខ្លាំង ។ កម្លាំងនគរបាល ស្រុកកូនមុំ កំពុងស្វែងរកមនុស្សដែលបានបាត់ខ្លួន ។
គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា បច្ចុប្បន្នស្ថានទឹកជំនន់នៅក្នុងប្រទេសកម្ពុជាមិនទាន់បង្កផលបះពាល់ធ្ងន់ធ្ងរដល់ប្រជាពលរដ្ឋនោះទេ ខណៈគណៈកម្មធិការជាតិគ្រប់គ្រងគ្រោះមហន្តរាយ បានត្រៀមខ្លួនជានិច្ចជួយប្រជាពលរដ្ឋនៅពេលមានបញ្ហា។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា បច្ចុប្បន្នស្ថានភាពទឹកជំនន់នៅក្នុងប្រទេសកម្ពុជា មានខេត្តមួយចំនួនរងផលបះពាល់ពីជំនន់ទឹកភ្ញៀង តែមិនបង្កផលប៉ះពាល់ធ្ងន់ធ្ងរនោះទេ ខណៈគណៈកម្មាធិការជាតិគ្រប់គ្រងគ្រោះមហន្តរាយ បានត្រៀមខ្លួនជានិច្ចជួយប្រជាពលរដ្ឋនៅពេលមានបញ្ហាកើតឡើង។ក្រៅពីនេះ លោកបានអំពាវនាវដល់ប្រជាពលរដ្ឋត្រូវបង្កើនការប្រុងប្រយ័ត្នឲ្យបានខ្ពស់ផងដែរ។
សម្រាប់ផែនការបម្រុងទុក របស់គណៈកម្មាធិការជាតិគ្រប់គ្រងគ្រោះមហន្តរាយ ដើម្បីឆ្លើយតបនឹងគ្រោះ មហន្តរាយ ពិសេសបញ្ហាទឹកជំនន់ នៅរដូវវស្សាឆ្នាំ ២០២២នេះ គឺបានត្រៀមនូវកម្លាំងអន្តរាគមន៍ចំនួន ១៦កង ទូទាំងប្រទេស ស្មើនឹងជិត ២០០០នាក់ រួមទាំងមានបំពាក់នូវសម្ភារៈសង្គ្រោះបន្ទាន់ យានជំនិះ និងស្បៀងបម្រុងជាច្រើនទៀត ៕
