ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការនិងដឹកជញ្ជូនមានប្រសាសន៍ថា បន្ទាប់ពីបានចូលរួមស្តាប់ការធ្វើបទបង្ហាញស្តីពីការសិក្សាវាយតម្លៃព័ត៌មានទីផ្សារ និងសេចក្តីព្រាង លក្ខខណ្ឌកិច្ចសន្យា រៀបចំដោយក្រុមហ៊ុន Ernst & Young ដែលជាក្រុមហ៊ុនផ្តល់សេវាប្រឹក្សាយោបល់សម្រាប់ការសិក្សាគម្រោងផ្លូវល្បឿនលឿនបានបង្ហាញថា ចម្ងាយផ្លូវរាជធានីភ្នំពេញ-ខេត្តព្រះសីហនុ នឹងកាត់បន្ថយចម្ងាយមកត្រឹមតែ ១៩១គីឡូម៉ែត្រ គ្រាដែលចម្ងាយផ្លូវនេះមានប្រវែងសរុប ២៣០គីឡូម៉ែត្រ។
ការបញ្ជាក់យ៉ាងដូច្នេះ បន្ទាប់ពីបិទកិច្ចប្រជុំពិភាក្សាអំពីវឌ្ឍនភាពគម្រោងអភិវឌ្ឍន៍ផ្លូវល្បឿនលឿន ភ្នំពេញ-ក្រុងព្រះសីហនុ កាលពីរសៀលថ្ងៃទី១២ ខែឧសភា ឆ្នាំ២០១៦កន្លងទៅនេះ នៅទីស្តីការក្រសួង។ លោកទេសរដ្ឋមន្រ្តីមានប្រសាសន៍ថា តាមគម្រោងសម្រាប់ផ្លូវល្បឿនលឿនខាងលើនេះនឹងមានរៀបចំជាផ្លូវហៃវ៉េ ទៅពីរមកពីរ។ ក្នុងគម្រោងនោះក៏មានផ្លូវបិទជិតដោយគ្មានសត្វគោ-ក្របី អាចឆ្លងកាត់ផ្លូវបាន ដោយមានកន្លែងចេញ-ចូលចំនួន ៧កន្លែង។ ជាមួយនឹងគម្រោងផ្លូវល្បឿនលឿន ភ្នំពេញ-ក្រុងព្រះសីហនុ លោកបញ្ជាក់បន្ថែមថា នឹងខិតខំយ៉ាងណា បញ្ចប់កិច្ចព្រមព្រៀងឲ្យបានត្រឹមឆ្នាំ២០១៦នេះ ដើម្បីបើកការ-ដ្ឋានសាងសង់។
សូមបញ្ជាក់ថា ក្នុងកិច្ចប្រជុំពិភាក្សាខាងលើនេះដែរក៏មានការអញ្ជើញចូលរួមស្តាប់របស់ លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា និង លោក វង្សី វិសុទ្ធ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ព្រមទាំងសមាជិកដទៃទៀតនៃគណៈកម្មាធិការផ្លូវល្បឿនលឿនផងដែរ។ ទីប្រឹក្សាក្រុមហ៊ុន Ernst & Young បានពិពរណ៍នានិងបកស្រាយការវិភាគរបស់ខ្លួនអំពីទិដ្ឋភាពផ្សេងៗ នៃគម្រោងសម្រាប់ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ ដែលមានប្រវែង ១៩១គីឡូម៉ែត្រ ក្រោមកិច្ចសន្យាសម្បទាននៃគម្រោង BOT (កសាង ប្រតិបត្តិ ផ្ទេរ)។
ជាមួយគម្រោងនេះ លោក ស៊ុន ចាន់ថុល និងអ្នកចូលរួមទាំងអស់ក៏បានពិភាក្សាលើលទ្ធផលនៃការសិក្សានិងបានជំរុញឱ្យក្រុមហ៊ុនផ្តល់សេវាប្រឹក្សាយោបល់ពិនិត្យមើលឡើងវិញនូវគម្រោងនេះ ហើយផ្តល់ព័ត៌មាននិងអំណះអំណាងបន្ថែមទៀតមកឲ្យគណៈកម្មាធិការវិញ ដើម្បីឲ្យគណៈកម្មាធិការអាចធ្វើការសម្រេចចិត្ត និងអាចចរចាជាមួយសាជីវកម្មស្ពានថ្នល់ចិន CRBC ឲ្យកាន់តែប្រសើរជាងមុន ដើម្បីធ្វើឲ្យគម្រោងនេះមានការរីកចម្រើនទៅមុខ ដោយយកចិត្តទុកដាក់លើការពិនិត្យមើលជាសំខាន់នូវបញ្ហា ហានិភ័យ និងអត្ថប្រយោជន៍សម្រាប់ប្រជាពលរដ្ឋកម្ពុជា៕
ដោយ៖ ស ដារ៉ា