ក្រុងប៉ោយប៉ែត៖ ម្នាក់ៗភ្ញាក់ផ្អើលជាមួយនិងព្រលឹងចុងសក់ ខណៈបានឃើញពីសកម្មភាពរបស់មន្ត្រីគយប្រចាំការដាក់ប៉ុស្តិ៍ខាងលិចកូនដំរី សង្កាត់និមិត្ត ក្រុងប៉ោយប៉ែត បានប្រដេញរថយន្តតាក់ស៊ីលួចដឹកទំនិញគេចពន្ធបន្តិចបន្ទួច លឿនដូចប្រណាំងឡាន ដែលអ្នកស្រុក អ្នកធ្វើដំណើរព្រួយបារម្ភពីបញ្ហាគ្រោះថ្នាក់ចរាចរណ៍អាចនិងកើតមាន។
ជាក់ស្ដែងនៅល្ងាចថ្ងៃទី១៣ ខែឧសភា ឆ្នាំ២០១៦ ការបើកឡានប្រដេញឡានតាក់ស៊ីពីមន្ត្រីគយ បើកបុកនិងបិទផ្លូវពីមុខរថយន្ត ក៏បណ្ដាលឲ្យបង្កជាគ្រោះថ្នាក់ចរាចរណ៍រវាងរថយន្តនិងរថយន្ត។ ក្នុងនោះមន្ត្រីគយបានតម្រូវឲ្យសមត្ថកិច្ចដែលរួមដំណើរផងជាមួយគ្នា ទៅអូសតៃកុងឡានតាក់ស៊ី វាយតប់ធាក់យ៉ាងសាហាវឃោឃៅ ព្រមទាំងនាំខ្លួនអ្នកបើកបររថយន្តតាក់ស៊ីនិងរថយន្តជាមធ្យោបាយដឹកទំនិញគេចពន្ធយកទៅស្នាក់ការគយ។
ប្រជាពលរដ្ឋរិះគន់ថា មន្ត្រីគយដាក់ប៉ុស្តិ៍ប្រចាំនៅចំណុចកូនដំរី ប្រៀបបាននិងកុងត្រូលជជុះ ព្រោះជាទម្លាប់គេតែងតែឃើញថា បើរថយន្តដឹកទំនិញ មានអ្នកចូលបង់លុយ មិនចាប់ តែបើក្រុមតាក់ស៊ីមិនបានបង់លុយ បើកឡានប្រដេញបង្កើតជាកំហឹងឆេវឆាវ ហើយខ្លះទៀតមានរថយន្តតាក់ស៊ីនិងរថយន្តដឹកទំនិញគេចពន្ធដាក់ខែ ហាក់ដូចជាចំណាំច្បាស់ មិនដេញ មិនហៅ ទុកឲ្យឆ្លងកាត់តាមអំពើចិត្ត៕
ដោយ៖ សីលា
